ORANJESTAD (AAN): Sue Ann Ras, Lider di e proyecto Codigo di Proteccion di Mucha y Hoben a duna di conoce durante un conferencia di prensa cu e ley aki
ta wordo ehecuta caba y aworaki ta bezig cu descripcion di e rol di supervisor di e codigo di proteccion.
Esaki ta un funcion ehecuta pa un profesional den veld cu extra experticio riba tereno di abuso di mucha, unda tur profesional cu ta cay bao di Codigo di Proteccion por haci un apelacion, Ras a splica.
El a agrega cu aworaki ta bezig cu e fase aki y unabes cu e lidernan di e proyecto ta keda cla den tur e instancianan ta bin e siguiente fase na unda ta bay haya e supervisor di e codigo.
E instancianan ta bay wak unda mester un supervisor di codigo cu ta bira un rol y no un trabao di 8 ora diario.
Ta stipula aworaki mescos cu na Hulanda cu ta 4 ora ta haya esey y hunto cu Minister Glenbert Croes y tambe henter gobierno ta purbando aworaki pa hacie mediante di un decreto nacional na unda cu ta duna tambe reconocimento na e rol di un supervisor di codigo, a bisa.
Segun Ras, e supervisor di codigo lo haya 4 ora cu e ta ehecuta e trabao aki pa su instancia of pa diferente instancia den caso cu e instancianan ta mas chikito.
Banda di esaki tur luna tin un boletin informativo unda cu cada lider di proyecto ta indica kico nan a haci, con e proceso di codigo di proteccion ta bayendo den cada sector, kico ta e puntonan cu a resalta of cu a logra.
BOLETIN Y WEBSITE
E boletin aki ta sali tur luna y ta mande pa tur stakeholder pa nan ta informa riba e proceso aki di implementacion, Ras a splica.
Finalmente, el a bisa cu pa dia 30 di April nan lo lansa nan website di Codigo di Proteccion. Ta trahando riba esey hunto cu Unicef Nederland di cual ta haya hopi 'input'.
Otro siman lo lansa e website aki cu ta trahando riba dje, a duna di conoce.
