Reunion cu partido PPA tabata positivo y hopi habri

Director di ATIA Herrick Henriquez

*A papia di reforma fiscal, escasez laboral y falta di incentivo economico

ORANJESTAD (AAN):  Herrick Henriquez, director di ATIA, despues di e reunion cu miembronan di partido PPA a indica cu e reunion aki tabata uno positivo y hopi habri. A papia riba e diferente puntonan, preocupacionnan y vision pa futuro, con nan ta wak cu lo mester traha cu cualkier gobierno cu sinta.

Algun di e puntonan cu a atende cu nan ta reforma laboral, escasez di labor, reforma fiscal pa bin cu un sistema di BTW y a palabra cu lo comparti cu Otmar Oduber e solucion cu IMF a bin cune na 2018, cual ta simplifica y trece e puntonan corecto pa un isla manera Aruba y cu ATIA ta kere lo bay yuda den futuro.

            Pa Sr. Henriquez e punto principal na e momentonan aki ta e escasez di labor, tin hotelnan nobo ta bay habri y tin un mercado laboral cu tin hopi hende indocumenta y mester busca un sistema pa regularisa nan pa nan por cuminsa contribui na entre otro e primanan social cu lo yuda nos tur.

ATIA a identifica tambe cu gremionan algun ‘low hanging fruit’ unda cu tin hende cu permiso di estadia y cu nan casa ta traha, pa nan por haya permiso pa por traha. Por ehempel, si nan pasa Enseñansa pa Empleo, nan por haya un permiso laboral.

            Herrick Henriquez ta expresa cu awo ta e momento cu tin mester di mas hende na pia di trabou cu lo yuda den e etapa cu ta bay bin y evita cu bin cu problemanan social, pasobra door di e escasez, hende lo bay overwork.

            ATIA ta considera tambe cu departamentonan di gobierno mester bira mas eficiente, un ehempel di dje ta DIP unda tin riba 150 aanvraag pega di companianan cu tin mester di un pida tereno pa nan por crece.

            “Crecemento di economia ta pega awo, no tin incentivo di inversion awo desde cu BBO a subi y a bin BBO na frontera. En bes di djis coy un pida mas grandi di e bolo, ban crece e bolo pa tur hende por haya un pida mas grandi”.

            Finalisando, director di ATIA a bisa cu tin puntonan cu nan ta di acuerdo cu PPA, otronan cu respetuosamente no ta di acuerdo cu nan. Nan no a haya e Plan Nos Aruba 2025-2050 ainda, pero asina e ta cla Otmar Oduber lo mand'e pa nan y ATIA di su banda lo manda su puntonan pa PPA y asina wak unda por yega na otro den futuro.