Eliminacion di BBO y reduccion di gasto di gobierno tabata dos di e puntonan central

Reunion hopi positivo y habri entre PPA y ATIA

ORANJESTAD (AAN):  Otmar Oduber, lider di PPA despues di reunion cu ATIA a indica cu e reunion aki tabata hopi importante pasobra e curazon di Plan Nos Aruba 2025-2050 ta concentra riba e desaroyo di nos hendenan; con nos hendenan ta posiciona nan mes den economia di Pais Aruba y den nan calidad di bida. Naturalmente e plan ta basa tambe riba e forsa laboral y e forsa economico di e pais, con nos por tin un miho biba, con nos por reduci costo di bida y con por tuma pasonan pa logra esakinan.

            Oduber a gradici ATIA pa e reunion y a bisa cu e tabata un di e miho reunionnan cu e tabatin, durante cual a papia riba puntonan cu claramente ta preocupacionnan di e pais, di comerciantenan, di e negoshinan na Aruba, pero tambe a purba match esakinan cu e necesidadnan cu tin den comunidad, di e clase trahado y con nan por tin un miho biba.

            E punto di e reforma fiscal a wordo poni hopi cla dilanti, PPA ta un di e prome partidonan cu a vocifera cu BBO no por continua, mester wordo cambia, y esey ta algo cu PPA lo bay haci den e prome añanan di gobernacion. Den cuadro di esaki a papia riba un sistema di BTW cu lo kier introduci, caminda di un banda ta simplifica e sistema di cobransa di gobierno na frontera.

            Pero di otro banda, e parti cu a wordo laga afo tempo di BBO, tin e parti di duna comunidad bek, baha loonbelasting, elimina inkomstenbelasting, percura pa winstbelasting pa comerciantenan tambe participa den e economia aki di volumen. Efecto di esaki lo pone cu e poder di compra di e ciudadanonan ta hopi mas halto.
            A papia tambe riba reduccion di gasto di gobierno, cual mester ta paralelo na e reforma fiscal. PPA a mara e reduccion akin a 12% cu ta 140 miyon Florin pa aña. Mester percura pa esaki por bay bek den inversion den salud, den nos pensionadonan, pasobra PPA no ta kere cu pa soluciona e problemanan aki mester bay coba den fondo di SVB of AZV.

            Otmar ta di opinion cu gobierno tin un responsabilidad pa contribui na dje pa no trece e fondonan akin a peliger, manera otro partidonan si ta sugiriendo.