Ursell Arends, Lider di Partido RAIZ:
ORANJESTAD (AAN)—Den su relato den cual lider di Partido RAIZ, ta reacciona riba declaracion di Parlamentario di PPA, Otmar Oduber, e ta sigui bisa cu e situacion di Dump y Incinerator ta herencia di e ex-minister aki.
“Como minister mi a sera dump pa introduci un maneho di desperdicio realmente responsabel basa riba teoria y practicanan sostenibel. Refiriendo na e teoria di Lansink cu den corto ta basa riba re-uza- recicla y reduci, cual ta wordo sosteni door di nos profesionalnan, esey ta sin menciona e situacion caotico cu mi a encontra riba e dump y alavez e cantidad di casonan den Corte cu lo a costa mas di 30 miyon florin na multa pa aña.
A trece un plan pa desperdicio solido y likido; a publica e plan y a aloca fondo pa transforma e dump cu ya por mira e diferencia y a traha riba e ley pa un RWZI nobo. Manera cu tur otro plan cu a traha riba dje durante mi temporada den gobernacion, esaki tambe ta disponibel riba publico.aw(https://publico.aw/assets/data/policies/20231214A/mtino_-_aanpak_afvalbeheer_2022-2025.pdf).
Tambe durante e periodo cu mi a sirbi mi pais, mi a propone pa como gobierno, conduci un “Health Impact Assessment” pa asina midi y identifica e daño cu e dump durante 70 aña largo a causa e habitantenan. Tin un departamento di gobierno cu no a duna conseho positivo pa conduci dicho estudio.
Na Aruba tin datos cu ta mustra cu tin un porcentahe halto di e habitantenan di barionan cerca di Dump di Parkietenbos cu tin malesanan cronico, entre otro cancer.
Pa salvaguardia e salud di nos hendenan, primordialmente y tambe e salud di nos naturalesa cu ya caba ta bou di tanto otro presion, mester a introduci un maneho di desperdicio responsabel y sostenibel. Como parti di esey nos mester a cera e dump di Parkietenbos y e mester keda cera!
“Semper mi tabata tin un gran admiracion pa Otmar Oduber como politico. E ta un politico cu ta “walk the talk”. Den su carera como politico Otmar a logra cosnan remarcabel pa nos pais. Pero alavez e ta e mesun Otmar Oduber cu awe ta un convicto y tambe e ta e mesun persona cu a fiesta cu fondonan publico di Serlimar hincando Serlimar den situacion financiero desastroso. E ultimo aki pueblo no por lubida!” Ursell Arends señala pa conclui su relato.
