Den conferencia di prensa fraccion MEP:
ORANJESTAD (AAN) Parlamentario Evelyn Wever-Croes y Parlamentario Xiomara Maduro, a yama un rueda di prensa den cual como lider di fraccion di Partido Movimento Electoral di Pueblo (MEP), Evelyn Wever-Croes a hiba palabra pa duna pueblo informacion cu tin di haber cu e Rijkswet y e conseho ricibi for di Professor mr. Douwe Jan Elzinga.
Parlamentario Wever Croes a toca tres tema al respecto: e prome tema ta un conseho cu nan a haya di un Profesor di Hulanda, e di dos tema ta e acuerdo cu a wordo firma aña pasa y e conseho huridico cu esaki no ta algo cu ta mara gobierno, sigur no Parlamento, y e di tres tema ta e debate cu Wever-Croes a reta señor Mike Eman pa nan tene, y cu te dia di awe e no a tende di dje.
“E prome punto mi kier a para keto un rato na lo siguiente: pa loke ta trata fraccion di MEP den pasado y aworaki tambe, ora ta trata un discusion cu tin cu Hulanda riba un tema huridico, semper nos ta busca un conseho huridico di un profesor Hulandes. Esey ta pasobra nos kier controla si nos ponencianan ta corecto y semper un conseho asina ta sostene bo tambe den bo ponencia. Nos a pidi Minister Professor mr. Douwe Jan Elzinga pa duna nos un conseho”, Parlamentario Wever-Croes a duna di conoce.
El a señala cu Professor Elzinga ta Emeritus Hoogleraar Strafsrecht y Bestuursrecht na Rijksuniversiteit Groningen y Hoogleraar Strafsrecht na Universidad di Aruba, di aña 1995 te 2019. Y riba peticion di nos fraccion, el a duna nos un conseho.
“Den su conseho e ta duna poco informacion tocante e leynan di consensus di Reino. Eigenlijk, por bisa cu a wordo crea pa stimula mas colaboracion entre dos cu tres, cu cuater pais di Reino. Pero mas y mas, principalmente despues di 2010, e Instituto Instrumento di Consensus Rijkswet ta wordo uza mas pa impone riba e paisnan. E intencion tabata pa crea un trato mas igual den Reino, entre por ehemplo Hulanda y Aruba, pero mas y mas el a bira un modelo pa pone presion.
E consecuencianan cu e ta mira di e ley aki pa Aruba, ta cu ta Hulanda esun cu ta bay determina e rumbo di nos presupuesto y nos maneho den futuro. Professor Elzinga ta bisa tambe cu nos Parlamento ta perde su budgetrecht y su amendementrecht. Esakinan ta derechonan fundamental di un Parlamento pa cu presupuesto y pa cambionan den presupuesto. Tambe e ta bisa cu e cambio den e leynan nos dilanti di e Ley di Reino HOFA ta stipula cu Hulanda tin cu bay duna aprobacion prome cu Aruba por cambia un ley den futuro; esaki ta contra nos Constitucion y e ta avisa tambe cu e supervision cu aworaki segun e ley cu gobierno di AVP-Futuro a bay di acuerdo cu ne, e Ley di HOFA, e supervision aki cu ta bay bin, no ta temporalmente, pero ta bay ta permanentemente, mirando cu ta dificil pa bo sali afo. Basa riba esakinan el a duna algun alternativa.
