Parlamentario Xiomara Maduro
- “E acto aki ta ilustra abuso di poder di Gobierno y persecucion politico”
ORANJESTAD (AAN): Dialuna mainta den conferencia semanal di Fraccion di MEP den Parlamento, Parlamentario Xiomara Maduro a elabora riba e caso recien unda cu diabierna ultimo e 15 comisario di Utilities Aruba a gana nan caso sumario contra Gobierno y Hues a ordena cu tur mester bay traha bek. Sinembargo, segun Maduro, Gobierno di Aruba no ta respeta y cu e acto aki ta ilustra abuso di poder di Gobierno AVP-Futuro y ta considera esaki un persecucion politico.
Diabierna ultimo, 10 di October, Huez ta pone e sentencia aki y ta schors e decision di Gobierno di e retiro di e 15 comisarionan aki y ta indica cu nan mester wordo paga y nan mester yega na pia di trabou y tambe haya tur informacion pa nan por haci nan trabou. Pa cada dia of parti di dia cu Gobierno no cumpli cu e veredicto, mester paga un boet di AWG.2.500,- te cu un maximo di 250.000 Florin pa cada un di e 15 comisarionan aki.
Parlamentario Maduro a elabora riba algun punto importante di e veredicto di Huez. Entre otro, un decision pa kita un comisario mester ta motiva. Mester trata na un manera drechi y no por yega kita comisarionan for di trabou sin duna un motibo valido. Argumentonan cu ta pasobra tin un gobierno nobo cu vision nobo, director nobo cu kier bay un direccion nobo, y cu no tin confiansa den e comisarionan aki cu a wordo apunta pa e gobierno anterior, no ta motibonan valido.
Un otro punto cu Huez a indica ta cu esnan cu ta pensa diferente, den e caso aki Gobierno di Aruba, nan no ta comprende of ta lubida cu un bestuur of Raad van Toezicht di un N.V. di Gobierno, tin cu haci su trabou na un manera independiente y Gobierno no por dicta kico nan tin di haci.
“Analisando loke Huez ta bisa den e veredicto, eigenlijk Huez ta bati riba man di e companianan di utilidad y ta manda un mensahe cla pa tanto Minister Baba Herde como pa Minister Arthur Dowers. Bo no por kita comisarionan djies pasobra ta e Gobierno di MEP a pone nan eynan”, Parlamentario Maduro enfatisa.
Segun Maduro, e comisarionan den nan defensa a bisa cu nan retiro ta trata di persecucion politico. Y Huez, segun e parlamentario, a duna nan razon y esaki tambe tin poni preto riba blanco riba e veredicto.
Diadomingo 12 di October, Gobierno a mustra di no ta respeta e decision di Huez duna dos dia prome y den pura den fin di siman, Gobierno a manda carta pa tur e 15 comisarionan aki pa avisa nan cu nan ta schors nan. E carta aki a wordo firma pa director di Utilities, Minister Dowers y Minister Herde sin preocupa cu e boet halto cu Gobierno mester paga cada comisario si no cumpli, lo costa nos pueblo hopi placa.
“Awe, ta importante pa nos para keto pasobra esaki ta un abuso di poder cu ta bay costa pueblo mas placa na awa y coriente. E gobierno aki ta trahando riba un legado caminda nan ta persigui hende y ta perde tur tipo di berguensa y ta falta respet na e decision di Huez”, Parlamentario Xiomara Maduro a enfatisa.
