Parlamentario Jennifer Arends-Reyes:
- Y un pueblo cu ta sinti e beneficio den su bida real
ORANJESTAD (AAN) Parlamentario Jeniffer Arends-Reyes, den entrevista cu Matutino DIARIO a sigui elabora riba e percepcion di IMF tocante Aruba su direccion na prosperidad y bienestar.
Ademas, Arends-Reyes a señala, IMF a reconoce e esfuerzo di Aruba pa diversifica su economia den sectornan prometedor, por ehemplo agricultura, economia circular, economia renovable y economia creativo.
El reitera cu esakinan ta sectornan prometedor pero necesario tambe, mirando cu mundo ta den desaroyo y cu semper tin su retonan tanto den “claimant Change” y cualkier otro riesgo cu Aruba por tin como Isla chikito y Estado den desaroyo.
“Tambe nos mester percura pa tin e parti di seguridad alimenticio, pa nos no keda dependiente riba un pilar so, aunke cu nos ta mira cu esaki ta keda den e region tambe, cu e parti di turismo ta keda fuerte.
“E apoyo di IMF sigur ta un señal cla cu Aruba ta move den un direccion di innovacion, resiliencia y oportunidad pa nos pueblo, y tambe den e parti di inversion social y bienestar, cu mi ta kere ta un punto di aprecio caminda nan a pone enfasis riba e gasto social di gobierno. A destaca tambe medidanan manera aumento di pensioen, distribucion bek di remedinan, y sosten pa gruponan vulnerable. IMF ta reconoce tambe cu Aruba ta implementando un politica di budgeting, basa riba e prioridadnan real, mehora e bienestar social, aumenta poder di compra y promove prosperidad pa tur hende” Arends-Reyes a señala.
E Parlamentario ta kere cu un di e puntonan cu tabata hopi bon ta e parti di e proyecto pa publico. “Y akinan a pone atencion den e bon practica di, por ehempel, e Fondo di Desaroyo di Aruba (FDA) cu ta demostra transparencia y eficacia den e maneho di recurso y tambe e sugerencia den esaki pa implementa un modelo semehante na un Fondo di Inversion Publico, cu ta habri porta pa mas impacto, y e resultado concreto, semper cu cooperacion entre entidadnan publico y control responsabel di gasto”, Parlamentario Arends-Reyes a remarca.
Finalmente, el a bisa cu e parti di validacion internacional e ta kere cu IMF ta duna Aruba esaki y e sosten di esaki pa e pasonan cu Aruba ta tumando pa logra un modelo economico mas husto, sostenibel y inclusivo.
“Pa nos, e fraccion di AVP, sigur e rumbo ta cla. Un Aruba fuerte, diversifica, y un pueblo cu por sinti e beneficio den su bida real”, Parlamentario Jennifer Arends-Reyes a conclui.
