Parlamentario Evelyn Wever-Croes ta remarca:
ORANJESTAD (AAN) E di dos punto cu Parlamentario Evelyn Wever-Croes, lider di Fraccion di MEP, kier a comparti den conferencia di prensa, tocante e tema di Rijkswet, ta cu den e mesun conseho cu MEP a pidi Professor Elzinga, ta pa contesta e siguiente pregunta pa nan:
“E pregunta ta, si e acuerdo cu nos Gobierno a firma na 2024, aña pasa, un acuerdo di tres pagina, ta bindend, kiermen si e ta mara Gobierno of ta mara Parlamento. Su contesta ta: Absolutamente cu no!
“Cu e acuerdo di 2024 cu ami a firma, ta un intencion di e partidonan pa bay negocia. Un intencion pa purba wak si ta yega na un Ley di Reino. Y si no logra? Bo no ta mara na dje! Pakico nos a pidi e conseho huridico aki? Pasobra oponentenan cu ta gobernantenan aworaki di AVP y Futuro, bo no ta scucha nan papia di e ley y sigur no di su consecuencianan. Unico cos cu bo ta scucha nan bisa ta ‘Gobierno di MEP a firma’. Evelyn a firma. Ora mi ta combersa cu hendenan den Comunidad, nan ta bisa ‘di con gobierno t’esey so nan por bisa? Nan no sa kico ta para den e ley? Nan no ta interesa pa sa kico ta para den e ley? Mi ta splica nan cu esey ta politica.
Mi ta purba di duna un contesta simpel pasobra e ciudadano no ta mucho interesa den detayenan y talvez e ta kere e contesta simpel ey. Pues, pa kita tur duda, hasta nos tabata esey caba, pero semper cu ta bin cu un profesor Hulandes cu ta bisa esey, e tin manera mas peso pa kita tur duda. Professor Elzinga a bisa nos cu e acuerdo firma na 2024 no ta bindend, e no ta duna un compromiso huridico entre e partidonan, e ta un intencion politico, pero no un palabracion Constitucional”, Parlamentario Wever-Croes a señala.
E ta spera cu, cu esaki MEP ta bari for di riba mesa e argumento cu e gobernantenan y esnan cu ta sostene Gobierno di AVP-Futuro ta blo bisa cu nan tabata mara. “Mi a topa señor Eman siman pasa, mi a puntre kico a para cu e debate, el bisa ‘mi tampoco kier e rijkswet, pero abo mes a firma’. Mi a bise cu loke mi a firma no ta bindend y cu e sa esey”, Parlamentario Wever-Croes a remarca.
