ORANJESTAD (AAN): Miembronan di fraccion di AVP den Parlamento a realisa un bishita oficial na e tereno di Refineria di Aruba (RDA) cu ta situa na San Nicolas,
caminda nan a ricibi un presentacion detaya y un rondleiding pa haya un miho comprension di e estado actual di e refineria y e plannan na corto plazo.
Durante e bishita, representantenan di RDA a duna informacion tocante e proyecto di desmantelacion, mantenemento di instalacionnan, y tambe e esfuerzo continuo pa cu e posibilidad pa activa e area aki pa ta uno rendabel.
E parlamentarionan tambe a haya e oportunidad pa haci pregunta y expresa nan preocupacionnan, specificamente tocante impacto ambiental, oportunidadnan pa empleo y e rol cu e area por tuma den un desaroyo economico den futuro pa San Nicolas.
Parlamentario Jennifer Arends-Reyes a indica: “E bishita aki ta esencial pa nos como representante di pueblo. Nos mester wak di cerca pa compronde e realidad di e tereno, pa asina por tuma decisionan cu ta balansa interes nacional, sostenibilidad y bienestar di e comunidad.”
