Parlamentario John Hart di AVP
ORANJESTAD (AAN): Parlamentario Hart di fraccion AVP kier pone riba mesa di discusion atrobe e contracto dudoso cu WEB Aruba N.V. a firma cu Eagle LNG.
Parlamentario Hart a dirigi pregunta na e minister actual cu tin bao di su encargo e maneho di WEB Aruba N.V. hunto cu e peticion pa presenta na Parlamento y duna contesta den un vragenuur.
Ya ta algun aña caba cu a firma dicho contract dudoso y ainda tin un silencio total encuanto esaki. E parlamentario kier sa kico tur a pasa desde e dia ey y te cu aworaki. Por ehempel: Eagle LNG a cuminsa cu su trabaonan na Aruba? Nos compania estatal WEB Aruba N.V. mester a cuminsa haci pagonan na e compania aki? Cuanto placa mester paga conforme e “contract” misterioso caminda nisikiera Parlamento di Aruba a haya esaki pa studia debi na e asina yama ‘non disclosure agreement’.
“Mi ta compronde cu huridicamente tin un non-disclosure agreement, pero gobierno mester por duna Parlamento di Aruba claridad riba e asunto aki paso ta patrimonio di pueblo,” Hart ta enfatisa. Tur esaki ta pregunta cu ta basa riba e preocupacion cu ta biba den comunidad ya cu esaki no ta un contracto cu ta pa un termino corto, pero mas bien pa 20 aña largo cu WEB Aruba N.V. (Aruba) ta mara na esaki!
Claramente, segun esunnan cu a sigui e proceso aki di cerca, ta deduci cu parti di e negociacionnan a worde haci pafo di e canalnan normal di control y supervision. Esaki a crea falta di claridad riba kico tabata e motibo pa a scoge e compania Eagle LNG specificamente y con e prijs na final a worde determina!
Den tur e asunto aki, si WEB Aruba N.V. en berdad tabatin den su vision pa futuro pa bay over na uzo di e producto cual ta di gas, no tabatin otro ofertanan di otro compania(nan) internacional cu tambe por a ofrece esaki?
Parlamentario Hart ta haya cu pa falta di documentacion publico ta haci difícil pa evalua si e contracto aki ta cumpli cu e criterionan legal di transparencia y integridad cu sigur ta exigi di un compania estatal manera WEB Aruba N.V. Manera ya a accentua, e contract cu Eagle LNG ta inclui obligacionnan di termino largo pa entrega, cu por pone nos compania estatal WEB Aruba N.V., y na final consumidornan (comunidad di Aruba), cu e riesgo di prijs halto, obligacionnan financiero pa hopi aña; y loke ta mas peligroso, ta e dependencia na e compania aki.
Hopi ta e pregunta pendiente, y a pesar di peticionnan repetitivo for di miembro(nan) di parlamento, como tambe di medionan di comunicacion, e informacion cu tin disponibel ta masha limita. Esey ta duna pia na diferente sospecho y indicacion cu cierto clausula den e contract ta em pugna cu bon maneho y e proceso normal vigente pa empresanan estatal.
Tambe sigur ta na su lugar pa evalua e obligacionnan cu WEB Aruba N.V. a tuma pa cu e contract dudoso aki. Remarcabel ta, segun Hart, cu prome cu firmamento entre WEB Aruba N.V. y Eagle LNG, algun ehecutivo halto mester a bandona nan puesto cu un ‘golden handshake’; entre nan persona prominente liga na partido MEP. E pregunta cu ta bin dilanti ta: Pakico mester a retira? A caso nan no kier a forma parti di e proceso dudoso entre WEB Aruba N.V. y Eagle LNG? Terminando parlamentario Hart kier enfatisa cu su rol ta pa controla gobierno y ta importante pa Parlamento di Aruba tin claridad riba e asuntonan asina importante cu ta patrimonio di pueblo.
