AVP ta pidi accion urgente contra problema di adictonan ambulante den ciudad

Parlamentario di AVP, Clifford Heyliger:

ORANJESTAD (AAN): Parlamentario Clifford Heyliger (AVP) ta pidi accion inmediato di gobierno pa combati e problematica creciente di adictonan ambulante den nos centro di ciudad, un situacion cu ta crea desorden, ta costa negoshi den daño, y ta stimula insiguridad entre tur usuario di e area.

   Segun Heyliger, e problema aki no ta nobo, pero ta sigui empeora sin un plan cla di maneho. “Tur dia nos ta wak vandalismo, molester na negoshi y turistanan, consumo di substancia den via publico y yamada constante pa ambulans y polis. Esaki ta un situacion cu ta fo’i control,” Heyliger a bisa.

Den e cuadro aki, el a dirigi preguntanan formal na Minister di Salud y Minister di Husticia, insistiendo riba:

(1) Plan di accion structural:  Kico ta e strategia formal di gobierno pa maneha e problema creciente di adicto ambulante? Ta conoci cu tin hotspot na lugarnan manera e parkeo banda Hotel Central y banda Corte di Husticia; dicon no ta tuma medida mas firme antes cu e problema escala?

(2) Asistencia preventivo y rehabilitativo: Tin suficiente espacio pa rehabilitacion? Cua guia of alternativa ta ofrece pa trata e persona cu ta luchando cu adiccion?

(3) Siguridad pa comunidad y comercio: Cua paso ta tuma pa proteha negoshi, habitante y turista contra vandalismo y violencia relaciona cu adiccion?

   Heyliger ta expresa su preocupacion particular riba adictonan cu ta comete vandalismo repetitivo y ta nenga tratamento. “Si un persona no kier busca rehabilitacion y ta sigui comete echonan castigabel, mester detene nan.

   Mientras gobierno ta inverti den iniciativanan manera Ban Caya Bek, Heyliger ta ripara cu no por tapa wowo pa un problema “cu ta kima manera un cancer y cu mester un respuesta urgente, serio y structural.”