Parlamentario Evelyn Wever-Croes:
*Hulanda mester wak con bon nos ta para financieramente pa determina un interes
ORANJESTAD (AAN): “Awor cu nos tin un realidad nobo nos dilanti, cu ta e consehonan oficial di Raad van State y Raad van Advies cu ta bisa cu HOFA ta limita autonomia y constitucion di pais Aruba, nos mester hiba e discusion cu si e minamento y limitacion aki di nos autonomia cu Hulanda ta exigi como condicion pa baha nos interes, ta un condicion husto of no”, asina Parlamentario Evelyn Wever-Croes a enfatisa dialuna mainta despues cu Raad van State a publica su conseho riba ley di Reino HOFA.
Segun el a duna di conoce, cu no ta di awe sino di comienso caba, Hulanda a indica cu e ta dispuesto pa fia Aruba na interes abou, basta nos entrega nos autonomia. “Awor nos a constata cu HOFA ta un entrega di autonomia. Y Aruba mester contesta awo si nos ta haya e condicion aki husto”, el a remarca.
El a enfatisa cu pa Partido MEP, e argumento awo mester ta cu si Hulanda kier presta Aruba na un interes mas abou, e mester wak con bon nos ta para financieramente, si Aruba por paga bek y cumpli cu su debe. “Esakinan ta argumentonan cu mester hunga un papel importante ora mester determina un interes. No si Aruba mester entrega su autonomia y kita su independencia pa haya interes mas abou”, Parlamentario Wever-Croes a expresa.
Segun e, MEP ta di opinion, cu mirando e situacion financiero di nos pais, mirando cu nos ta yegando na un debe den GDP di 60% e aña aki caba, mientras cu durante pandemia esaki tawata 120%, mirando con bon nos a desaroya economicamente pero principalmente financieramente, cu ta algo cu Raad van State a confirma tambe den su conseho, y ta elogia Aruba riba esaki, nos no mester entrega nos autonomia pa haya interes abou.
“Si Hulanda kier yuda nos, Hulanda por yuda nos riba e condicionnan cu mescos banconan ta haci, cu ta mira con bon bo ta paga, con bon para bo ta financieramente, y si bo ta un bon cumplido”, Wever-Croes a subraya.
El a conclui e topico aki bisando: “Awo cu Raad van State, Raad van Advies, Partido MEP, PPA, Parlamentario Mike de Mesa di AVP, profesionalnan experto riba e tema, mas di 10 mil firmanta y sindicatonan di Aruba, tur ta di opinion cu HOFA ta mina y limita autonomia di Aruba, nos no ta haya ta husto pa entrega nos autonomia pa baha interes riba nos debe. Nos ta haya cu tin otro maneranan cu mester por yega na baha interes, sea cu Hulanda of otro caminda”.
