Parlamentario di AVP, John Hart
ORANJESTAD (AAN): Durante e reunion reciente di Interparlementair Koninkrijksoverleg (IPKO) den Tweede Kamer na Den Haag, parlamentario di AVP John Hart a hiba palabra tocante un tema cu segun dje ta merece atencion continuo den Reino Hulandes: e asina yama ‘deficit democratico’ den e relacion entre e paisnan constituyente di Reino.
Hart a cuminsa su intervencion cu e siguiente cita: “When we avoid difficult conversations, we trade short-term discomfort for long-term dysfunction.” Cu e mensahe aki, el a enfatisa cu tin combersacionnan dificil cu no por sigui wordo evita si Reino Hulandes kier avanza den direccion di un relacion mas balansa, respetuoso y ekitativo entre tur su paisnan.
Segun Hart, e deficit democratico ta referi na e desbalansa constitucional cu ta existi den Reino Hulandes, caminda Aruba, Corsou y Sint Maarten tin influencia limita riba decisionnan cu ta tuma na nivel di Reino, mientras cu Hulanda, pa medio di su posicion dominante, tin un influencia considerablemente mas grandi.
Como ehempel concreto, Hart a menciona loke a sosode dia 25 di maart 2026 durante un votamento na Nacionnan Uni tocante un resolucion relaciona cu sclavitud. Den e caso aki, Reino Hulandes, representa door di Hulanda, a opta pa abstene di vota sin consulta previo cu Aruba, Corsou y Sint Maarten.
“E caso aki ta mustra claramente cu tin decisionnan cu por tin implicacionnan historico, politico y moral pa tur pais den Reino, pero cu no semper ta wordo coordina ni consulta cu tur socio igual manera e Statuut ta inspira nos pa haci,” Hart a expresa.
Durante e sesion, parlamentario Hart a dirigi su preguntanan y observacionnan na e Evaluatiecommissie Samenwerking in het Koninkrijk. E panel di experto tabata consisti di Paul Comenencia, Staatsraad van het Koninkrijk; Maria van der Sluis-Plantz, presidente di e Evaluatiecommissie Onderlinge Regeling Samenwerking bij Hervormingen; Bote ter Steege, ex-Procurador General di Aruba y ex-Hoofdofficier van Justitie na e BES-eilanden; y Roban van Herk, consultor na TNO.
Segun Hart, e reaccionnan cu a sigui ta indica cu e preocupacionnan tocante e deficit democratico ta resonando tambe entre diferente actor na Hulanda.
Parlamentario Hart a pone enfasis tambe riba e trabounan cu ya a haci den IPKO, incluyendo e labor di e Comision Deficit Democratico, cu a prepara y presenta diferente recomendacion pa sigui fortalece e posicion di e paisnan Caribense den Reino.
“E conclusion y recomendacionnan di e comision lo contribui pa eleva e debate riba e tema aki. Mi ta spera cu tur pais cu forma parti di Reino lo asumi nan responsabilidad pa sigui traha na solucionnan concreto,” Hart a declara.
Segun e parlamentario, e incomodidad cu ta resulta di e discusion aki no mester wordo mira como algo negativo, sino como un oportunidad pa crecemento institucional y fortalecemento di e relacionnan mutuo.
“E incomodidad den Reino mester sigui wordo papia den agenda di IPKO. Incomodidad por ta positivo si e ta conduci na reflexion, respeto mutuo y accion. Pero pa logra esaki, tur pais den Reino mester asumi nan responsabilidad y trata otro cu e respeto y dignidad cu cada pueblo merece,” Hart a conclui.
