Drs. Shailiny Tromp-Lee:
ORANJESTAD (AAN): Parlamentario drs. Shailiny Tromp-Lee a duna un declaracion desde Den Haag, caminda el a desmenti cu e negociacionnan rond di e Rijkswet HOFA a tuma lugar a base di boluntad propio. Tromp-Lee a subraya cu desde un principio Aruba a wordo poni den un situacion di dwang pa acepta condicionnan cu no ta husto, y cu e mesun presion ta continua awor den forma di un strafrente.
-Dwang desde e prome momento
E Parlamentario a aclaria cu e fachada di cooperacion structural no ta cuadra cu e realidad historico. E Bestuurlijk Akkoord di 2024, firma bou presion den contexto di recuperacion post-pandemia, no tabata e expresion di un consensus liber, e tabata e resultado di un situacion caminda Aruba a keda “gestraf” cu un strafrente.
"Esaki no ta a base di boluntad propio y liber. Desde un principio nos tabata den un situacion di dwang: take it or leave it. Prome tabata pa nos por haya e financiamento di emergencia, y awor na e momento di paga, nan ta impone e strafrente riba nos pasobra nos no a bay di acuerdo cu RAft. E pregunta cu mester wordo contesta ta: si un acuerdo no tin boluntad propio como base, con e por wordo yama consensus?" Tromp-Lee a declara.
-Negociacion desigual
Mientras Corsou y Sint Maarten a ricibi sanacion di debe na 2010 ora nan a haya un status comparabel na loke Aruba tabatin caba desde 1986, Aruba no a ricibi ningun beneficio comparabel. Awor, bou di HOFA, Aruba ta wordo exigi e mesun restriccionnan si pero sin e mesun base di apoyo financiero economico.
Echo ta papia pa su mes: e aña aki Aruba ta pa di tres aña consecutivo nos ta pagando strafrente riba e debe di COVID. Esaki apesar di a reduci su debe for di 117% pa 61% di su GDP, confirma pa e Raad van State, y a cumpli cu tur norma presupuestario na tempo."Nos ta e unico pais den Reino cu ta wordo castiga mientras cu nos ta cumpli. Mesun obligacion, pero no mesun trato,” Tromp-Lee a splica.
-Nos derecho pa dicidi pa nos mes
Pa e Parlamentario, e centro di e asunto ta uno constitucional. Aruba tin un Status Aparte desde 1986, 24 aña prome cu e otro islanan a haya algo comparabel. E derecho ta inclui e libertad pa dicidi con pa maneha nos propio finansas, specialmente ora e resultadonan ta papia pa nan mes.
"Nos no por acepta pa wordo castiga como pais mientras nos ta cumpli cu tur nos obligacionnan. Toezicht ta comprendibel. Pero e instrumento aki, un Rijkswet imponi sin boluntad propio, no ta necesario y no ta husto. Y nos lo sigui splica esaki, cla y bon argumenta," Tromp-Lee a conclui.
