Despedida di Parlamento #10 di Aruba cu a sinta den e periodo 2017-2021

ORANJESTAD (AAN) – Diaranzon mainta a tuma lugar den Sala di Parlamento, e otorgamento di e credencialnan di e miembronan di Parlamento cu lo huramenta awe,

y tambe e despedida di e Parlamentarionan cu a sinta den e periodo 2017-2021, cu tabata e Parlamento # 10 na Aruba.

            Presidente di Parlamento saliente, mr. Ady Thijsen a dirigi e ceremonia aki, y el a yama bon bini na tur presente, entre nan miembronan di KPA, tambe e publico y prensa, awor cu a flexibiliza medidanan pa cu covid-19, expresando cu nan presencia ta hopi importante como parti di e sala aki.

            Na prome lugar mr. Thijsen a lesa e agenda cu a consisti di e siguiente cuater puntonan: 1. Ingekomen Stukken; 2. Onderzoek geloofsbrieven en toelating als laden der Staten; 3 Afscheid van de niet-terugkerende Statenleden; 4. Sluiting Zittingsperiode 2017-2021.

            Seguidamente, el a yama dilanti e lidernan di fraccion di e Parlamento saliente, den e orden aki: Rocco Tjon, Lider di fraccion di MEP; Ricardo Croes, lider di fraccion di RED; Alan Howell, di fraccion POR; Parlamentario Independiente Dellanire Maduro; Parlamentario Independiente Daphne Lejuez; Marlon Sneek, lider di fraccion di AVP.

            Di e manera aki mr. Thijsen a conclui cu e prome punto di agenda, y a sigui cu esun di 2: “Onderzoek geloofsbrieven en toelatings als leden der Staten” cual ta den man di un Comision presidi pa Hendrik Tevreden.

            A para e reunion un rato pa asina e miembronan di e Comision por a revisa e documentonan concerni, y haci nan onderzoek pa despues otorga e credencialnan.