ORANJESTAD (AAN) – Ex-parlamentario Independiente, Daphne Lejuez, a expresa na prensa, cu e ta hopi gradici tur esnan cu a sostene su persona,
durante e tempo cu e tabata den Parlamento y aworaki cu e eleccion, mirando e resultado cu el a logra cu a cay na su agrado.
Lejuez a expresa cu loke el a logra den Parlamento, ta trece claridad y transparencia, locual ta hopi importante y cu e por a educa pueblo tocante kico ta pasando realmente den Parlamento, pa asina tin mas participacion, di parti di pueblo den e proceso politico di nos pais.
Daphne Lejuez a expresa cu e forma con el a hiba politica no ta uno di tira lodo, pero un politica profesional, di trata e temanan cu ta wordo trata den Parlamento, envez di e personanan.
“Mi ta spera cu por a inspira otro politiconan nobo pa tambe haci mescos, pasobra na final nos tin cu hisa e calidad di nos Parlamento, y tambe pa e pueblo por participa ora nan compronde e temanan cu ta wordo hiba y treci dilanti y dicidi riba dje den Parlamento, y cu ta afecta nos tur”, e dama a indica.
El a agrega cu Parlamento 11, tin un tarea grandi su dilanti. “Nos tin e COHO y e RAft pa pasa, y tin tambe e uitvoeringsagenda cu tin hopi punto cu ta toca bek Parlamento pa dicidi riba dje. Pues, mi ta desea nan hopi sabiduria, pasenshi y curashi, particularmente, pa tuma e decisionnan necesario cu, probablemente, no ta bay ta popular”, Daphne Lejuez a subraya.
Tocante e hecho cu apesar cu el a haya 500 voto, el a retira di Accion-21 y no lo drenta Parlamento, Lejuez a agrega cu danki Dios den e sistema di Aruba, e voto ta bay pa persona, aunke e ta bay riba partido.
“Den caso tal cu lo tin un vacatura bek pa e asiento ey, sigur lo mi asumi mi responsabilidad, pero mientras tanto mi lo bay enfoca riba mi famia un tiki mas bek, ya cu mi a neglish’e hopi tempo; particularmente mi yiunan cu aworaki ta bay den exterior, y mi kier enfoca riba mi salud. Pero un cos ta sigur, e personanan cu a deposita nan confianza den mi, Daphne no ta bay pa largo, Daphne lo tey semper, sea ta den politica of no, pero semper pa yuda su pais”, Daphne Lejuez a remarca.
Finalmente, Lejuez a subraya cu tin hopi ley cu mester pasa den Parlamento cu ta rekeri di 14 asiento, kiermen cu mester di union.
+“Mi ta urgi esnan cu lo bay tuma e decisionnan aki, pa pensa hopi bon, kico nan kier bay logra; y pa pensa riba Aruba na prome lugar. Dus, no pensa riba politica partidista, ni riba ego, pero pensa kico ta na bienestar general di Aruba. Esaki ta e ultimo mensahe cu por laga y mi ta spera cu e resona cerca tur esnan cu tin cu tuma decisionnan: cu Aruba mester ta semper na prome lugar!” e dama a conclui.
