Lider di fraccion AVP, Jennifer Arends-Reyes:
- Entidadnan gubernamental ta sigui trata e tema aki
- Ta necesario pa tin plannan di contingencia
ORANJESTAD (AAN): Den contexto di e desaroyonan geopolitico mundial, lider di fraccion di AVP, Parlamentario Jennifer Arends-Reyes riba Diadomingo, a expresa cu ta di gran importancia pa Aruba keda monitor y ta prepara pa cualkier cambio regional of internacional cu por tin impacto riba nos pais.
Durante reunionnan reciente na Parlamento cu Minister President, Sr Mike Eman, kende a indica cu entidadnan gubernamental y expertonan local, a trata temanan tocante siguridad regional, movecion di potencia mundial den Caribe, cambio climatico, y su impacto posibel riba e stabilidad economico y social di Aruba.
Parlamentario Arends-Reyes a enfatisa cu preparacion strategico y coordinacion interinstitucional ta clave: “Nos ta biba den un region caminda potencianan mundial tin interes strategico. Aruba, como parti di Reino Hulandes, tin un rol di stabilidad, pero esey ta bin cu responsabilidad. Nos mester keda alerta y cu plannan, tanto na nivel diplomatico como na nivel interno, pa proteha nos interes nacional y bienestar di e pueblo Arubano.”
E lider di fraccion di AVP tambe a resalta cu ta necesario pa tin plannan di contingencia y pa sigui fortalece cooperacion cu reino, particularmente den area di siguridad, infrastructura critico, energia y salud.
