ORANJESTAD (AAN): Aruba Ports Authority a bati alarma na Polis riba Diamars atardi 4:15 pm, cu un yate di charter ‘The Midnight Sun’ lo a haya problema riba lama, y a hasta haya informacion cu el a cuminza sink.
Aruba Ports Authority a indica cu mientras tanto Guardacosta di Caribe Hulandes y tambe Helicopter a wordo poni na altura.
E momento ey mesora Central di Polis a dirigi un unidad di Strandpolitie pa bay na Punta Brabo (area banda di Manchebo Beach Resort) pa check e situacion y confirma si acaso nan ta mira e yate for di tera.
Na caminda pa e lugar, Polis a haya informacion adicional cu abordo di e yate Midnight Sun aki tin 6 persona, y cu nan a haya informacion cu e motornan ya a sink completamente. E ultimo ‘location’ cu e Capitan a duna ta cu nan ta den area di Punta Brabo. Despues di esey Havenkantoor di Aruba Ports no tabata haya contacto mas cu e capitan.
E yate ‘The Midnight Sun’ ta uno tipo ‘single-hull’ di 44 pia largo, cu ta ofrece tur tipo di charter pa turistanan, sea pa celebra cumpleaño, fiesta cu amigonan, y djis core a lo largo di costa di Aruba.
For di riba e beach di Manchebo, Polisnan a mira un yate blanco como 1 miya pabao riba lama. Nan por a mira cu e parti patras di e yate ta bao awa, y e parti dilanti di e yate ta saliendo demasado mas afo cu normal na halto for di awa.
Polis a keda vigila di leu, te ora cu a mira con Guardacosta di Caribe Hulandes a yega na e yate. Via di binocular nan a mira con e turistanan a pasa y subi e boto di Guardacosta.
E Helicopter di Polis tambe a yega y for di halto nan por a mira cu e miembronan di tripulacion di e yate ta trahando duro pa saca e awa for di e yate usando hemchi.
Punto Brabo ta un area unda den historia ta masha hopi boto a yega di haya problema. E ta un zona unda dos coriente di lama sa topa otro, y e olanan eynan ta pone botonan move di tur angulo. E por sorprende hasta e mihor nabegante cu un ola inespera cu por yena e boto instantaneamente cu awa.
Si bo deck di motor no ta bon seya, e awa cu basha ta bay te paden di dje y afectabo.
E bon noticia ta cu tur hende a keda sano y salvo. E potret aki pa cortesia TripAdvisor.
