ORANJESTAD (AAN): Un noticia cu ta preocupa comunidad ta esun relaciona cu e entrada di personanan ilegal na e isla.
Esaki parce di ta un noticia cu nunca lo caba ya cu e informacion cu a drenta na mesa di redaccion ta mustra cu diadomingo madruga un grupo di personanan indocumenta a drenta Aruba na Dos Playa na Parke Arikok. Nan a yega abordo di un boto chikito.
Personal di Parke Arikok cu a haya e melding a mobilisa y a topa cu varios 'life vest' como tambe cu e restonan di e boto cu a kibra na e barancanan.
Relaciona cu e melding aki a pone Polis como tambe Guardacosta na altura di e sucedido.
No ta conoci cuanto hende a yega den e boto, pero parce cu tin testigonan cu lo a mira un grupo di persona subi den un auto y pesey ta sospecha cu e grupo aki lo tin di haber cu situacion aki.
Mientrastanto, Polis ni Guardacosta a emiti un informe al respecto.
