ORANJESTAD (AAN): Tabata Diabierna anochi banda di 8:35 pm, na momento cu un unidad di Polis di Playa ta coriendo riba Caya Betico Croes un tiki pariba di Casa Vieja Restaurant,
nan a mira con un BMW modelo S20i color blanco, a yega benta for di Scopapelstraat, net na e T-weg cerca di Yong Heng Market, y cu velocidad halto a subi Caya Betico Croes bay pabao.
Pues e no a ni stop na e cruzada-T pa duna preferencia, y a djis subi bay ta slinger bay-bin riba Caya Betico Croes ta bay pabao, y Polis a mira con e BMW S20i dado momento a baha banda drechi di caminda y casi a bay dal contra muraya di Queeny Laundry banda panort otro banda di Yong Heng Market.
Mesora Polisnan a duna e chauffeur un señal pa e stop, y el a haci esey tambe. El a para su auto un banda, habri porta y a baha pa warda Polis.
Ora cu Polis a yega, nan a bin haya e persona cu casi no por a para drechi riba su pianan, y su forma di proceder tabata raro. Polis a papia cune, y aki a bin mira cu su wowonan ta tur cora, y ta papia cu un lenga pisa. Agentenan a haya holor fuerte di alcohol ta sali for di su rosea.
Esey tabata suficiente pa Polisnan a detene pa 8:45 pm, relaciona cu el a viola Articulo 5 di Ley di Trafico. A manda busca un vehiculo special, cu a transporte pa Warda di Polis. Aki nan a pone eynan pa e haci test di supla den machine di Alco Sensor. Pero e chauffeur tabata asina burachi, cu e no por a ni supla mes.
Relaciona cu esaki, Fiscal Auxiliar a duna ordo pa kita e rijbewijs di dje. Su caso lo bay Corte, unda Huez ta esun cu lo dicidi pa cuanto aña e lo keda sin rijbewijs.
Mesora a pone Central di Polis na altura, y e nomber di e persona a ser hinca den Computer, pa asina e keda registra como un persona cu no tin rijbewijs por lo pronto.
