Turista a accidenta cu UTV riba Watty Vos Boulevard

ORANJESTAD (AAN): Diahuebs atardi a sosode un accidente unda tabata tin un turista riba UTV envolvi.

Esaki a sosode na e asina yama 'paperclip' na Seroe Patrishi riba Watty Vos Boulevard.
            Parce tabata tin varios UTV tabata circula den e ara aki, pero un di e personanan, un turista femenino, lo a confronta problema y a accidenta.

DIARIO a haya informacion for di un habitante di un cas net na e rotonde, cu a wak kico a sosode y a bisa cu e turista a bolter su so.

Polis como ambulans a presenta na e sitio pa atende cu e sucedido. E señora a keda levemente herida.

Por a mira cu turistanan mes riba Facebook tabata adverti di e suceso solicitando pa core cu precaucion. Tambe a wordo bisa cu hopi accidente a sosode den e ultimo añanan unda tin ATV/UTV's envolvi.