Accion riba lama pa stop dos Go-Fast pata-pata di droga

ORANJESTAD (AAN): E sistemanan di radar di Guardacosta di Caribe Hulandes, diripiente a detecta dos speedboat sospechoso ta move rapidamente riba nan pantaya.  Nan ubicacion ta mustra cu nan ta den cercania di Curacao.

   Mesora, e Centro di RCC di Guardacosta, a pone e cutter Jaguar na altura y a suministra coordinatonan pa bay intercepta e botonan aki cu ta moviendo rapido.

   Ademas di esaki, a notifica e barco di guera Zr.Ms. Holland cu ta nabegando den Caribe.  Nan a dicidi laga e helicopter NH-90 lanta vuelo pa bay den e direccion tambe.  Nan a bay asisti e cutter Jaguar.

   A bin descubri cu ta trata aki di dos speedboat tipo Go-Fast cu posiblemente a yega Curacao procedente di Alta Guajira di Colombia.  Ora cu e tripulantenan a ripara cu Guardacosta a blo riba nan, nan a aumenta speed aun mas, y a cuminza tira monton di bola den lama.

   Ni maske kico Guardacosta a haci, e botonan aki no kier a stop.  Pero a registra tur area unda e bolanan aki a keda benta y cu a keda drief.

   E oficialnan a haya nan obliga di los tiro di advertencia dilanti e botonan aki, y di e forma aki si porfin nan a bin stop.

   En total tabatin 8 tripulante riba e dos Go-Fast aki.  Nan a tira e bolanan afo, keriendo cu no por haci nada contra nan.  Pa nan malasuerte, personal di e cutter Jaguar a recore e ruta y a recoge tur bola for di lama.

   Asina a bay cu tur cos rumbo pa Pier di Guardacosta na Curacao, unda e ocho personanan a wordo entrega na Polis.  Riba e potret por mira cuanto droga a wordo gara.  Te cu Diabierna atardi, Guardacosta no a divulga ta cuanto kilo ni ki tipo di droga esaki ta.