Tin hopi hoben interesa den e trabao di Polis

KPA a organisa un anochi di informacion exitoso!

ORANJESTAD (AAN) : Na Abraham de Veer School situa na San Nicolas a tuma lugar un anochi di informacion. Cuerpo Policial Aruba bou invitacion di e dicho scol a duna presentacion y informacion na tur hoben cu ta interesa of kier a haya sa mas tocante Cuerpo Policial Aruba.

            E aña aki a conta cu mas o menos 100 hoben cu a pasa busca informacion pero tambe tabata interesa den e trabou di Polis. Dado momento mester a ripiti e presentacion algun biaha dor di e demanda di hobennan cu a yega masalmente na e anochi di informacion.

            Tambe e hobennan tabatin e oportunidad pa aplica mesora cu tambe a bay hopi bon na unda cu hopi hoben a probecha mesora pa aplica.

            E hobennan por a haci diferente pregunta na e docentenan di Scol pa Polis E.J. Watty Vos pero tambe na e unidadnan di K9 Unit, Unidad Motorisa, agentenan den opleiding como tambe Polis uniforma.

            Un anochi cu tabata hopi exitoso pa Cuerpo Policial Aruba mirando e acogida masal di e hobennan cu a yega pa inscribí y haya e informacion. Danki na Abraham de Veer School como tambe docentenan di Scol pa Polis E.J. Watty Vos cu a haci posibel cu hobennan por a mira y haya informacion di Cuerpo Policial Aruba.