Señora y su yiu chikito herida den accident pisa na cruzada di Sero Pita

Mesun cruzada atrobe

 *Mucha chikito a haya contusion cerebral 

ORANJESTAD (AAN): Diasabra den oranan di merdia, bisiñanan na e cruzada di Sero Pita atrobe a tende lastramento di brake y sonido fuerte di accident.  E golpi a sona duro, y mesora yamadanan a cuminsa drenta na Central di Polis.

   Central di Polis mesora a cuminsa manda unidadnan di Polis di Santa Cruz pa e lugar, y a pone Centro di Alarma pa nan manda Ambulans pa e cruzada famoso aki.

   E accident e biaha aki ta diferencia di e otronan, debi cu cada biaha ta e mesun cos ta pasa, esta cu un chauffeur pa un of otro motibo ta keda sin wak drechi, y ta subi e caminda sin pone atencion cu trafico ta bin.  Hopi biaha chauffeurnan no sa cu nan tin di rek un tiki pa mira si tin trafico ta bin riba e pida hero entre windshield dilanti y e prome bentana di porta di auto.  Esaki ta ser yama “A-Pillar”.  Chauffeurnan cu ta core sin cu na ta conciente di situacion rond di nan, ta esnan cu ta ocasiona accident.

   E prome unidad di Polis cu a yega, a bin topa cu un auto y un vehiculo cu bastante daño material.  E auto ta un sedan Hyundai Elantra color blanco cu number A-65199.  E vehiculo ta un Toyota Landcruiser Prado color berde cu number A-44930.

   E Hyundai Elantra tabata coriendo riba e caminda di preferencia, y tabata moviendo di Piedra Plat rumbo panort direccion Tamarijn.  Aki ta unda cu e Toyota Landcruiser Prado berde no a paga bon tino pa trafico, y a sali su dilanti inespera.  E auto a bay dal den e parti di porta patras y wiel patras di e vehiculo Toyota, y a hasta kita e wiel di eynan.

  Debi na e accident aki ocasiona pa e Toyota Landcruiser Prado, dos persona den e vehiculo ey mes a resulta herida, esta un dama y un mucha muher chikito, cu ta parce di tin 4 of 5 aña di edad.  Polis a bin haya e dama ta atende e mucha chikito riba asiento patras di e vehiculo, y tabata visible cu e mucha a ricibi basta golpi.

   Esey ta bin debi cu e mucha tabata sinta net unda cu e impacto a dal na e porta patras.  E golpi tabata fuerte, como cu tin indicacion cu e mucha ta seriamente herida.  Paramediconan a traha urgente riba dje pa stabilise, pasobra diripiente e mucha a bay fo’i tino y a stop di reacciona.  Paramediconan a core usa nan experticio pa “trece bek”, y a opta pa bay cune cu mas urgencia posible pa Hospital.  Un otro ambulans a transporta e dama herida tambe, y el a haya golpi y bolombonchi na su frenta, y tambe un herida eynan.

   Mirando e seriedad di e accidente aki, a solicita pa e Team Forensico di BFTO yega eynan pa tuma potretnan strategico y conduci e investigacion cu departamento di trafico. 

   Caminda a keda cera pa basta ora, tanto pa investigacion y despues pa takelwagen move ambos auto di caminda.

   Segun ultimo informe, criatura ta stabil pero a ricibi un contusion cerebral serio, tambe e mama di e mucha ta ok. Pues ambos ta stabil.