Polis investigando si caso di Hit & Run tabata intencional

ORANJESTAD (AAN): Tabata Diabierna atardi cu Central di Polis a core manda unidad di Polis di Playa rumbo pa Tarabana,

pa check un caso serio di Hit & Run cu a socede na skina di Mandolinstraat cu Pindastraat.

   E prome informe ta indica cu un Motorcycle lo a dal un peaton y lag’e herida atras.  Sinembargo ora cu e prome patruya a yega eynan, a bin tende cu ta un auto a dal un Scooter, y despues core bandona e lugar.  Scooter tabata wordo maneha pa un hoben.

   Varios testigo a bin dilanti, y a splica cu e auto cu a comete e Hit & Run ta un Nissan March, y cu hopi persona eynan ta sinti cu esaki no ta un accident, sino un acto intencional di Hit & Run.

   Diferente unidad mas di Polis a yega na e cruzada, pasobra ta parce cu e caso aki a escala debi na conflicto fuerte cu un famia den Mandolinstraat tin cu otro famia den Pindastraat.  Tambe a pidi presencia di Ambulans, como cu e motociclista hoben a keda herida.

   Ambulans y tambe Rapid Responder a yega na e lugar pa asina stabilisa e victima, y posteriormente a bay cune rumbo pa Servicio di Emergencia na Hospital pa ricibi tratamento medico.

   Demas unidadnan di Polis na e lugar a cuminsa investiga, y den cuadro di tur esaki nan a confisca 3 diferente Scooter di e area.  A tuma detaye di diferente testigo, pa asina autoridad por bay studia e caso.  E investigacion rond di e caso di Hit & Run Intencional aki ta sigui.