ORANJESTAD (AAN): E tin un nomber ora cu empleadonan na forma scondi ta ‘saca’ cuminda frozen pa bay cas cune.
“Mafiamento di cuminda” ta algo cu diferente Hotel na Aruba a yega di sufri di dje, ora cu empleadonan inconfiable a logra di descubri un forma con nan por saca cuminda for di freezer, pone un caminda pafo y despues ora di bay cas, ta hiba nan den auto.
Esnan na La Cabana All Suite Beach Resort a bin nota ultimo tempo cu basta caha di cuminda ta desaparece for di nan freezer. Cada biaha cu haci inventario, ta ripara cu na forma misterioso esakinan ta desaparece.
Esey a pone cu nan a bira mas cauteloso y vigilante, y tabata den oranan di atardi cu nan a descubri, cu ta nan mesun empleado ta esun cu sin cuero di cara ta bay cu e cuminda aki, poniendo full e compania den problema ora cu nan ta perde asina hopi caha valioso di steak, pisca, y galiña.
Ora cu nan a mira esaki socede, mesora Security di La Cabana a core yama Central di Polis. Nan a raporta cu nan a caba di atrapa nan empleado ta comete inside-job y ta bay cu nan cahanan di cuminda frozen.
Mesora a notifica Polis, cu e empleado ta coriendo un Nissan March color silver cu number A-36901. E resort a indica tambe cu nan kier entrega keho di ladronicia.
Mientras cu Recherche di Noord a cuminza investiga y tuma e denuncia aki, un boletin general a ser manda pa tur unidad di Polis riba caya pa nan tira bista riba e Nissan March aki, como cu el a caba di comete ladronicia.
Algun rato despues, un unidad di Polis riba caminda di Oranjestad pa Santa Cruz, a mira e Nissan March color silver aki, y mesora a pidi refuerzo como cu nan ta bay pare.
Den un rato di ora, dos otro unidad di Polis mas a yega, y hunto a stop e Nissan March aki na altura di Hooiberg.
Polis a ordena e homber pa e baha pa asina nan interoge. Nan a nota cu e homber tabata basta nervioso. Ora cu a coba den auto, a bin nota cu ya caba e “cahanan di cuminda” a wordo entrega. Ta djis algun cuminda so el a resta den auto.
E homber cu ainda tabatin e uniform di La Cabana All Suite Beach Resort bisti, a basha abao y a bisa cu el a caba di bende e cahanan aki caba. Pues e compay aki tin un negoshi di rebendedor di cuminda horta.
Polis a detene e homber mesora, y a bay cune pa Warda di Polis, unda Fiscal Auxiliar a duna ordo pa e keda deteni pa asina Recherche di Noord por sigui cu e investigacion.
A haya hopi placa di papel den su poder, indicando cu e cahanan aki a produci hopi Florin extra. E placa aki a wordo confisca.
Su Nissan March tambe a wordo confisca, y cu Takelwagen a ser hiba pa asina e investigacion ser haci riba dje tambe.
Aki ta mira con un persona ta escoge un rumbo no-corecto den bida, y ta daña tur su reputacion, destrui su carera den sector di horeca, ya cu posiblemente e Resort lo no kier mire mas riba nan payroll ni pa e pasa riba nan propiedad.
