ORANEJSTAD (AAN): Diamars siman pasa, e barco crusero di Carnival Horizon tabata presente den waf di Aruba, for di 8:00 am te cu 6:00 pm.
E mainta ey pa 9:45 am, un unidad di Polis riba Bicicleta na Playa, a subi caya pa asina haci chekeo y control den tur area, y specialmente ofrece seguridad na e turistanan di e barco crusero.
E agentenan riba bicicleta a core den Caya Betico Croes, y a nota cu den Caya Principal tur cos tabata na ordo. Despues e Polisnan a core den Havenstraat direccion pa Weststraat, y a mira cu tin hopi turista ta canando rond sin problema y sin molester.
Ora cu e Polisnan aki a yega den Werfstraat cu ta keda net pariba di entrada di Waf, nan a mira e conocido Adicto Ambulante, yama Colina, ta canando rumbo pa e Casita di Transformer di Werfstraat, y cu ta conoci cu e ta drumi eyden.
Mirando cu e ta poniendo masha hopi sushi mes patras di e Casita di Transformer aki, siendo cu apenas algun dia pasa personal di Serlimar a haci e area limpi, Polisnan a papia fuerte cu Colina y a dune ordo pa e bandona e area, y a tah’e tambe pa e no bay molestia e turistanan cu ta canando rond den ciudad.
E Polisnan riba Bicicleta despues a haci un control na e Cruise Terminal, y tur cos tabata na ordo. Por a mira hopi turista ta baha di e barco pa asina sali di Waf pa disfruta di e isla.
E unidad di Polis riba Bicicleta a bay haci e ora un control riba Trafico riba Lloyd G. Smith Boulevard na altura di Wind Creek Casino. Aki nan a stop 21 vehiculo, y a duna 1 boet na chauffeur cu a viola borchi di trafico (D4) cu ta indica cu bo tin di bira solamente den un direccion. Tambe a duna boet (di 200 Florin) na un automobilista coriendo cu auto cu no tin Keuringskaart. Nan a gara 1 chauffeur y dune un boet (di 500 Florin) pasobra e tabatin un Smartphone den man. Tambe a duna boet (di 200 Florin) na un chauffeur coriendo sin seatbelt bisti.
Banda di 1:20 pm, e Polisnan riba Bicicleta a duna ordo na e Adicto Ambulante Colina pa e bandona e Parada Grandi di Bus.
Alrededor di 4:00 pm e unidad di Polis riba Bicicleta a pasa den area di Edificio di Corte di Husticia pero tur cos ta trankil. A keda core den Havenstraat, Lloyd G. Smith Boulevard, Weststraat y Werfstraat te 5:45 pm, te ora cu tur turista ya a subi e crusero bek. No tabatin nada particular mas pa nan. Sigur un bon trabao!
