Quo Vadis Aruba - ORANJESTAD (AAN): Tabata Diabierna marduga a presenta na Warda di Polis Oranjestad pa 1:20 am,
e turistanan di inicial S., tambe di inicial P., y hunto cu nan e taxista di inicial O.
E dos hombernan a declara na Polis cu nan ta turista na Aruba y nan a worde asalta y horta na San Nicolas bao menaza di un pistol.
Segun e turistanan S. y P., tur cos a cuminza ora nan a yama pidi pa un Taxi pa hiba nan San Nicolas. Nan a pone San Nicolas den Google y nan a wak mucha muhernan masha bunita.
E taxista di inicial O. a hiba nan na un bar na San Nicolas. Ora cu nan a yega, e turistanan S. y P. a pidi e taxista O. si acaso e por warda riba nan.
Nan a tuma e number di celular di e taxista O. y a drenta Bar. Oranan nan a keda cla, nan a yama e taxista O. cu mesora a yega bek y busca nan.
Ora cu nan tabata bek den taxi, e turistanan a sinti cu nan tin di bay urina, y nan a puntra e taxista O. si e por para e vehiculo un rato pa asina sali di vehiculo y urina.
E taxista O. a bisa cu eynan e no por para, pero lo bay hiba nan na un otro lugar pa nan baha y urina.
Asina nan a yega na un parkinglot banda di un Pool.
Inespera a blo un homber desconoci cu color di cuero scur cu un tapaboca. E homber aki a bin na e bentana di auto di Taxi cu un pistol di silver di 9 mm y na ingles a bisa: “Don’t move, give me your money”.
E turista S. a bisa cu e asaltante a tene pistol dilanti su cara y a kita su smartphone Samsung Note 9 color preto, y 600 Dollar cash cu e tabatin den su poder.
Despues e homber desconoci a bay cerca e turista P. cu su pistol den su cara y a kita su smartphone Samsung Galaxy S8 color silver den estuche cora, y 1.000 Dollar cash cu e tabatin den su poder.
E Taxista a bisa cu e asaltante a yega cerca dje y cu menaza di pistol a kita su celular di dje.
Polis mesora a pone Atraco Team na altura, y a notifica Wachtcommandant di e asunto aki. Tambe a laga Slachtofferhulp yega pa presta yudanza na e victimanan aki.
Awor autoridad ta investigando e caso aki. E potret aki ta uno di archivo.
