Dos accident na Paradera den menos cu 5 minuut di otro

ORANJESTAD (AAN): Riba Diasabra atardi tabatin dos accident na Paradera, y nan a socede den menos cu 5 minuut di otro.  Apenas 1.6 kilometer leu for di otro.

   E prome a tuma lugar na e cruzada di Paradera cu ta bay pa Sero Preto, net banda di Paradera Gas Station.  Aki e dalmento tabata entre un auto compacto Chevrolet y un sedan Hyundai.  No tabatin heridos.

   E otro un poco despues a socede net na e entrada pa bay Subway Paradera, y e accident tabata entre un sedan Toyota y un SUV Hyundai.  Aki tampoco ningun hende a resulta herida.

   Tanto autoridad como Gobierno a ripara cu den luna di Juli y Augustus tin un aumento drastico den cantidad di accident riba Aruba.  Net awor cu tin e crisis di pandemia y preocupacion cu camanan na Hospital ta yenando cu pashent di Covid-19, sigur no ta e momento pa heridonan di accident tambe ta bay tuma espacio na Hospital.

   Por fabor ban core mas trankil, pone mas atencion na trafico, evita di take chance y warda bo turno si bo no tin preferencia.  Mihor bo yega laat, envez di yega trempan den Hospital.