Polisnan a indica cu nan lo bay traha e anochi pa Parada di Carnaval

ORANJESTAD (AAN): Den fin di siman, Polisnan na Aruba a indica na nan Sindicato SPA, cu e momento a yega pa nan tambe bay bek ‘na normalidad’ y cu tin di stop di recorta e 12.6% for di nan salario.

   Ademas di esaki Sindicato SPA a haya input di nan miembronan, cu a opina cu si cos sigui asina, nan no tin gana di bay traha e anochi di e Parada di Carnaval planea pa Diasabra 26 di Februari venidero.  Tur esaki pasobra nan ta opina cu si Gobierno no tin placa pa kita e 12.6 porciento, e ora no por tin placa tampoco pa organiza e Parada di Diasabra venidero.

   Polisnan a manifesta nan malcontento e mesun siman cu Secretario di Estado Hulandes, esta Alexandra van Huffelen a mustra cu ainda no ta e momento oportuno pa kita e 12.6 porciento aki.  Esey ta loke Gobierno tambe ta bisando, y ta sugeri otro forma pa cuminza haci e pago bek na normalidad.

   Diabierna mainta Polisnan a planea di tene un sorto di ‘Accion di Morocoy’ for di 12:00 pm te cu 2:00 pm, y cu kizas e lo sigui Diasabra y tambe Diadomingo.  Pero Polis a garantiza cu tur trabao esencial pa duna asistencia urgente lo a sigui normal.

   Ordo di Medida: Sinembargo ora cu Polis a haya tende di e ‘Accion di Morocoy’ aki, nan a manda un asina yama ‘Ordo di Medida’, y Huez cu a haya esaki pa atende a bay di acuerdo cu tur e puntonan treci dilanti.

   Huez a dicta mesora cu Sindicato mester stop nan ‘Accion’ mesora, como cu esaki ta perhudica seguridad di Aruba.  A impone tambe un clausula cu si acaso Sindicato SPA no cumpli cu e decision di Huez, nan lo tin di paga un multa di 100 mil Florin.

   Cancela e Accion: Esey a pone cu riba Diasabra, Sindicato SPA a informa su miembronan riba decision di Huez.  Esey a pone cu Polinan a stop cu e Accion, y a sigui traha normal.

   Tambe nan a dicidi cu Polisnan lo bay traha normal riba e anochi di Parada di Carnaval cu lo ta Diasabra venidero.