Atrobe tin hende na Aruba ta cay pa e scam aki...
ORANJESTAD (AAN): E scam aki ta conoci rond mundo pa como 10 aña caba. E ta varia bastante, pero e esencia principal ta: Hamas duna hende straño bo number di cuenta di banco pa nan deposita placa riba dje pa abo bay haci “trabao” pa nan. Pasobra na final, abo ta bira victima ora bo haya sa cu e placa deposita ey ta procedente di ladronicia, y lo peor ta cu bo ta bira un sospechoso tambe, y algun hende na Aruba a hasta wordo deteni.
Cuerpo Policial di Aruba a caba di emiti un boletin pa adverti cu un biaha mas hendenan local na Aruba ta birando sospechoso y alavez victima di fenomeno “Mystery Shopping”.
Polisnan kier a concientisa y alavez avisa e pueblo di Aruba pa e fenomeno di “Mystery Shopping “cu ta lantando cabez un biaha mas. Na aña 2020 Cuerpo Policial a haya casonan di Mystery Shopping. E tempo eynan Recherche a haci nan investigacion pa cu esaki. E aña aki un biaha mas kehonan a cuminsa drenta na Cuerpo Policial di e fenomeno aki un biaha mas.
T’asina cu KPA kier concientisa y avisa e pueblo di Aruba pa pone atencion pa cu esaki. E modus operandi ta como lo siguiente:
E persona cu ta acercabo pa traha p’e, a logra hack un cuenta di un otro persona y ta lanta/horta placa for di dje.
Abo na Aruba ta worde acerca via Facebook pa un hende desconoci di un otro pais, cu ta propone na dje si e kier gana placa trahando pa nan compania.
E persona desconoci ta pidi e persona na Aruba cu ta interesa den e trabao pa su number cuenta di Banco Arubiano pa e por deposita e placa pa asina e por haci e compranan.
E placa cu supuestamente dunado di trabao ta pone ariba bo cuenta di banco, el a horta di un otro cuenta di banco di otro hende.
E persona na Aruba asina a haya e placa ariba su cuenta bancario sin pensa cu ta placa procedente di ladronicia. Nan ta bise cu su unico trabao ta di pasa pa un “Mystery Shopper” y bay cumpra iTunes Gift Cards na diferente establecimento cu ta bende esaki.
Ora e tin e carchinan aki di iTunes, e mester djis raspa y manda e number (code) di e carchinan pa e persona desconoci aki via Facebook. E persona local tambe mester traha un supuesto rapport con el a haya e servicio di e lugar na unda el a cumpra e carchi etc. Suppose eta parti tambe di su trabao pa e por worde paga pa su servicio.
Loke e persona na Aruba no sa cu e placa cu a worde poni riba su cuenta bancario, a worde horta for di cuenta di banco di un otro hende.
Asina e persona cu a kere cu e ta trahando pa un compania di afo ta bay over di “trahado” pa “victim”.
Vocero di Polis a confirma, cu basta persona local a bira victima/ sospechoso y a worde deteni.
Pa e motibo aki KPA kier a manda e aviso aki pa tur hende tene bon na cuenta pa no cay den e trampa aki y paga tino pa no bira victima di “Mystery Shopping”.
