Polis ta buscando ladron cu a horta Scooter aki riba Diadomingo marduga

ORANJESTAD (AAN): Diadomingo marduga pa 1:15 am, un dama hoben a raporta na Polis cu atrobe ladron a horta un Scooter di dje.

   Esaki ta di dos biaha cu ladron a horta un Scooter.  E biaha aki ladron a bay cu su Scooter color cora, preto y shinishi di marca Sigma GPS, fabrica na 2017.  E plachi number ta MFA-2698.

   El a splica cu Diasabra anochi pa 10:30 pm, el a staciona su Scooter na e stupi dilanti cas di su amiga na Caya Solo, den area di Tarabana.  El a laga e Scooter na lock y a keda intacto atras.

   Djis algun ora despues, pa 1:30 am, ora cu el a sali pafo el a ripara cu e Scooter no tey mas riba e stupi.  El a bin realiza mesora cu ladron a pasa bay cune.

   E tanki di gasolin tabata cu yena cu 1/4 tank.  Den e compartimento di stul e tabatin su cartera color preto di marca Aldo.  Den e cartera e tabatin 100 Florin cash, su rijbewijs, zorgpas di AZV, cedula, y papel di aseguro.  E tabatin un locion di Aldo, y demas documento di e Scooter.

   Ladron a pasa bay cu su helm tambe!  Ta trata aki un helm marca MDX, color cora y preto, cu tabata poni riba su Scooter.

   E dama a splica Polis cu e no a duna ningun hende autorizacion pa bay cu e Scooter sin permiso.  Polis a tuma e keho oficial di e dama, y awor nan tin atencion pa e caso aki.

   Si abo sa kende diripiente desde Diadomingo mainta tin un Scooter Sigma GPS manera esun riba e potret aki, por yama Tipline di Polis na 111-41.  Corda cu bo por keda anonimo.