ORANJESTAD (AAN): Diadomingo mainta pa 8:35 am, un unidad di Polis di San Nicolas
a ser manda riba caminda principal di San Nicolas pa Playa, na altura di Citgo Savaneta, como cu tin molester di lekmento na gran escala di Diesel.
Ora cu Polis a yega na e gasoline station, nan a bin mira cu e pomp cu ta bende Diesel na e banda patras di e negoshi, ta tur kibra. A sali na cla cu den marduga, tabatin un auto cu a dal contra dje, a laga esaki kibra, y despues a sigui core bay. E auto ey lo mester tin daño material bastante.
E problema ta cu Diesel a cuminza leak di e pomp aki, y a cuminza core for di e caminda secundario di Savaneta aki, yega te riba caminda grandi, y aki core bay abao dilanti Super S-Chow.
Polis a dicidi na cera e Cruzada-T aki na Savaneta, y a desvia trafico. A pone tanto personal di DOW y tambe Cuerpo di Bombero na altura di loke a socede.
Como cu ta Diesel, e chens pa esaki kima ta minimo. Pero toch Bomberonan a dicidi na basha foam riba esaki pa evita lo peor. DOW a pone despues baricada pa evita cu chauffeurnan lo pasa riba dje.
Testigonan cu a mira e proceso aki, a indica na DIARIO cu nan a keda impresiona cu e forma con Cuerpo di Bombero a actua pa basha foam. Nan a traha cu hopi eficiencia y profesionalismo.
Na final, Central di Polis a wordo informa di e caso. Bastante liter di Diesel a bay perdi e marduga y mainta ey.
