ORANJESTAD (AAN): Dialuna nochi banda di 10:45 pm, net ora cu unidad di Polis di Noord ta pasando riba Irausquin Boulevard na Palm Beach dilanti RIU Palace Aruba Hotel,
nan a mira un Toyota Yaris color shinishi ta bayendo zuid riba e caminda. Polis a mira cu e plachi di number dilanti no ta original, pues uno cu nan mes a traha, debi na uso di un otro color y e grandura di e plachi cu no ta cuadra cu esun legal di Aruba. Pa colmo e numbernan mes casi Polis no por a ni mira.
Ora agente a check cara di e chauffeur, e oficial a reconoce e persona aki como un hende cu dia 21 di Juni el a duna multa pasobra e ta coriendo sin rijbewijs valido. Debi na trafico druk e momento ey, Polisnan a perde bista riba e auto, pues no por a bay su tras pa control’e.
Poco rato despues, banda di 11:10 pm e unidad di Polis a bin nota cu riba caminda di Palm Beach pa Noord, cu e Toyota Yaris shinishi ta staciona pabao di truck di Chalo Burger, esta riba e parkinglot di Smart 180 Convenience Store. Agentenan a ripara cu e mesun chauffeur ta tras di stuur, y un biaha mas a nota cu e plachi di number aki ta uno falso. Polis a dicidi stop pa controla e auto. Ora di acerca e auto, agentenan a mira claramente con e chauffeur tin su cabez baha ta wak abao, ta moviendo cu su mannan comosifuera e ta buscando forma pa sconde algo. Polis a yega cerca y nota cu tur dos man ta pushando algo den e saco banda drechi di su carson.
Pa seguridad di Polis, nan a dune ordo na varios ocasion pa e saca su mannan di e carson y hisa man den halto. Aki ta momento cu Polisnan a sinti holor fuerte di marihuana ta sali di e Yaris. Polis a sospecha cu e homber aki tin marihuana den su poder, y esaki ta loke e ta tratando di sconde.
Polis a saca e homber for di e auto y ordena pa e para banda di auto. Nan a puntre si e tin marihuana den su poder, y e persona a desmenti esaki. Despues el a duna permiso pa agentenan controla su auto. Den un investigacion a bin haya un sakito di plastico transparente conteniendo marihuana, tambe un sakito di plastico chikito conteniendo un pildora blauw parecido na un pildora di Ecstasy (XTC), y un pito di marihuana tambe.
Polis a habri e baul di e auto, y a mira un tas di schouder di marca Christian Dior. Ora cu a bay coba den e tas, a bin haya un paspoort Mericano, un peña di cabey cu man bruin, un bril di solo preto di marca Electric, un par di Apple AirPods color blanco, y varios documento, incluyendo e paspoort Mericano.
Nan a puntra e chauffeur di kende e paspoort ey ta. El a bin cu e storia cu e homber ey riba e paspoort “kizas” ta esun cu a bende e auto Yaris aki. Como cu e homber ta gañando bay goal mescos cu mucha chikito, Polis a dicidi manda e paspoort su detaye pa un otro Polis, cu a bay check controla den Computer. A bin haya sa cu e paspoort Mericano ey a wordo horta dia 18 di Juni 2023. E Mericano cu a denuncia e ladronicia di paspoort, a denuncia tambe ladronicia di e peña di cabey.
A base di tur esaki, Polis a haya suficiente motibo pa detene e homber di inicial C., relaciona cu violacion di articulo 2:397 (encubrimento) di Codigo Penal, y Articulonan 3 y 4 di Ley di Droga.
Ohala cu Ministerio Publico bin mas fuerte riba esnan cu ta comete crimen contra turistanan inocente riba e isla aki.
