Caso serio di hincamento
ORANJESTAD (AAN): Diadomingo mainta banda di 11:30 am, un unidad di Polis di Noord a ser manda cu urgencia na Servicio di Emergencia na Hospital, relaciona cu un pelea cu a keda registra na Eagle Beach.
Parce cu e victima a ser treci na Hospital, y e tin varios herida di cuchiu na su curpa.
Ora cu Polis a yega, nan a bin topa cu un grupo grandi di persona riba parkinglot di Hospital. Polis a papia cu e ruman muher di e victima. El a splica cu su ruman homber ta esun cu e momento ey ta wordo atendi paden na Servicio di Emergencia, y cu tin varios herida di hinca na su curpa. Despues Polisnan a sigui puntra esnan presente, kendenan mas tabata na e pelea.
Un di e hobennan a declara cu nan tabata na e pelea. Nan a splica cu nan tabata banda di e canchanan di Beach Tennis Aruba pazuid di La Cabana, ora cu un ex-amiga a yega eynan cu un grupo grandi di hoben, y a cuminza busca problema cu nan.
Esaki a pone cu e hobennan cu tabata na Beach Tennis Aruba a dicidi na cana bay rumbo pa Eagle Beach pa chill y evita di haya problema cu e troublemakers aki.
Pero un poco despues, e grupo di troublemakers tambe a yega na Eagle Beach y aki tambe nan a cuminza tira palabra, cu a escala despues den bringamento. Nan a mira un di e troublemakernan aki ta bringa cu e victima. E troublemaker tabata scop e hoben. Despues nan por a mira sanger ta core for di cabez y curpa di e victima.
Aki ta unda cu e grupo di troublemakers a dicidi stop di bringa y como cobarde a core bay direccion panort. E amigonan di e victima a dicidi na trece e persona mesora pa Servicio di Emergencia pa haya tratamento medico.
Despues cu personal di Hospital a caba di atende e hoben, Polis a bay papia cune. E hoben a declara cu e no sa mes kende e persona ta cu a bringa cune y hinke varios biaha.
A dicidi na pone personal na warda di Jeugd- en Zedenpolitie, como tambe oficialnan di Recherche di Noord, y di Bureau Slachtofferhulp pa bin duna un man. E investigacion ta sigui su rumbo, y e atake aki ta algo serio. E hoben cu a comete esaki lo bay ta encarcela pa algun tempo te ora cu e presenta dilanti Hues pa responde pa su actonan.
