Polis a detene 19 hende durante Jouvert Morning y total di 24 hende burachi tras di stuur

Algun hende sin placa pa paga nan boet mesora

ORANJESTAD (AAN): Diasabra marduga a tuma lugar na San Nicolas, e famoso parada di Jouvert Morning cu a start pa 3:55 am.

   Cuerpo Policial tabatin 128 oficial riba pia durante e evento aki.  Diferente departamento di Cuerpo Policial a traha hunto entre otro Mobiele Eenheid, Polis Uniforma, Departamento di Recherche, Personal administrativo, departamento di trafico y planologia, AE, Mobiel Commando y como tambe personal di CEA.

   E parada a dura como 5 ora den cayanan di San Nicolas, y pa 9:00 am e parada a yega su final.

   Detencion durante Parada:  Segun vocero policial Liliana Rasmijn, awor na 2023 nan a realiza un total di 19 detencion.

   E detencionnan tabata a base di tin arma blanco, droga, bringamento, buracheria, y hendenan cabez duro cu no kier a sigui ordo di polis.

   E suma total pa loke ta e accion di ‘Faya bo Haya’ ta 12.970 Florin na multa.  Si bo kier sali bek mesora, bo mester paga un suma di multa, y tabata acepta hasta Debit Card.  Pero a bin resulta cu hopi hende tabata haya e mensahe di ‘Insufficient Funds’ ora di trata di swipe nan carchi di banco.  Pues nan mester a keda encarcela.

   Vocero Policial a confirma na DIARIO, cu e multa di mas halto cu a ser duna ta 1.800 Florin na un solo persona.  Mas cantidad di violacion bo comete, mas halto e suma ta bira!

   Pues den 2023 tabatin 19 detencion durante parada.  Compara cu e ultimo Jouvert Morning di 2020, e tempo aya tabatin 21 detencion den e marduga y mainta ey.

   Detencion despues di Parada: Mientras tanto, Unidad Motoriza di Cuerpo Policial a tene control riba caya pa asina sigura cu caminda ta keda safe y cu chauffeurnan ta cumpli cu ley.  Den e controlnan nan a detene 24 persona despues y durante di e actividad.

   E Polisnan riba Brommer a eherce controlnan na puntonan strategico.  A controla un total di 180 vehiculo di motor y a detene 24 chauffeur bao di influencia di alcohol, di cual  7 tabata hende muher.

   Durante e control aki 8 chauffeur a perde nan rijbewijs, pues esaki a wordo “ingevorderd”.  Esey nifica cu e violacion di ley tabata asina estricto, cu an lo mester presenta dilanti Huez pa trata nan caso.  Aki ta pensa cu e resultado di e test di Supla a sali fatal pa nan, indicando cu nan no ta djis burachi, sino “banana-banana”.

   Cuerpo Policial Aruba ta keda conseha si bo ta bebe NO stuur.   Controlnan di unidad motorisa lo continua durante y despues di cada evento di carnaval.