ORANJESTAD (AAN): Diasabra anochi pa 8’or SMAC hunto cu Cuerpo Policial a haci inicio di e Lighting Parade.
E anochi aki tabata tin 6 grupo y mas o menos 2.400 participante. Pa e anochi aki por a conta cu 205 personal di Polis riba pia.
Vocero Liliana Rasmijn di Polis a indica cu diferente departamento di Cuerpo Policial a traha hunto entre otro Polis Uniforma, ME, AE, Departamento di Recherche, Motor Unit, K-9 , Personal administrativo, Mobiel Commando, departamento di planologia y tambe personal di CEA.
Detencionnan durante e Parada: Pa 12:55 am, e cabez a yega ex-DOW na cruzada di Lloyd G. Smith Boulevard y Paardenbaaistraat. Pa 1:55 am di Diadomingo marduga el a yega su final.
A lo largo di e ruta, e aña aki Polis a haci 12 detencion, pa esnan cu ta demasiado burachi of no ta sigui ordo di Polis. Compara cu e ultimo Parada di Luz di aña 2020, e tempo aya tabata tin 15 detencion.
Detencionnan despues di Parada: Un biaha mas, despues di e Parada di Luz a nota cu Polisnan riba Motorcycle, conoci como ‘Unidad Motoriza’, a bay na puntonan strategico pa haci control.
E anochi y marduga aki, un total di 9 chauffeur a keda deteni pa maneha auto bao influencia di alcohol. Ora di supla riba aparato sea cerca e oficial di Polis, of na Warda di Polis, e nivel di alcohol den curpa a sobrepasa e limite legal.
Cuerpo Policial ta keda conseha si bo ta bebe no stuur. Unidad motorisa lo keda controla prome, durante y despues di eventonan di carnaval.
Pues cu e 12 detencion durante e parada, y 9 riba caya, e anochi di Parada di Luz a conta cu 21 detencion.
