Persona cu a bay jog mainta a wordo haya morto na rand di dam

Investigacion pa haya sa si ta crimen of un accident

• Su señora mes a bin hay'e morto eynan
• E pida bahada aki ta slip si bo cana riba dje 

ORANJESTAD (AAN): Diahuebs mainta un señora a ripara cu su pareha cu tin custumber di sali mainta pa jog den nan vecindario, no a regresa bek na e ora stipula y cu e sa yega bek cas.

   Sintiendo cu algo no ta bon, e señora a sali di su cas y a bay sigui e ruta cu normalmente su pareha ta tuma den e area ey.  Esaki ta inclui e dam di Tanki Flip.

   Pasando eybanda el a mira cu na e bahada cu Trucknan di tanki ta baha pa asina chupa awa di e dam, cu tin un persona benta abao.  Esaki ta net na e bahada unda e santo ta un tiki cora cu piedra.

   Y eybao el a bin topa cu su pareha, benta drumi na su banda robez, cu su cabez pega contra pida duro, y sanger bashando for di su cabez y plamando riba e santo eybanda.

   Mesora a core bati alarma, y e yamada a drenta 8:40 am na autoridad.  Un unidad di Polis di Noord a yega mesora na e lugar.  Aki nan a tuma nota di e situacion, y a core seya e zona y a pidi e señora pa bay sinta un tiki mas leu.

   A core pone Central di Polis, cu a notifica demas instancianan, cu a inclui Recherche di Noord, mas unidad policial pa yuda cera e area, y a pone oficialnan forensico di BFTO tambe na altura pa nan acudi eynan.

   Personal di Bureau Slachtofferhulp tambe a yega eynan pa asina ofrece sosten y yudanza na e señora, kende ta labora den veld di salud na Aruba.

   Dr. Texier tambe a yega na e lugar, y a constata morto di e persona masculino bisti na short.  Awor personal di BFTO, hunto cu Docter Forensico lo tin di bay check di kico e persona aki a fayece.  Fiscal a duna ordo pa confisca e curpa.

   Personanan cu normalmente sa usa e pida bahada ey, a indica cu e tera cora ey cu e piedranan riba dje, ta hopi traicionero pasobra inespera debi na e inclinacion, e por ponebo slip y dal abao masha duro mes.  No ta sigur si acaso esey a socede, pero tin chens cu e victima a slip inespera y cay masha duro mes cu su cabez na baranca duro cu tin na banda.

   Esey ta djis un teoria, aunke ta danki na ciencia y investigacion forensico lo por determina si ta un accident a socede aki na e Dam di Tanki Flip, of kizas ta un crimen a ser cometi.  Cu monton di sacamento di potret, analisis di e area, y autopsia di e cadaver, lo bay yuda resolve e puzzle aki di e caso hopi lamentable aki.

   Te na ciere di edicion, oficialmente Polis no a duna ningun informe oficial di su nomber, ni edad.

   Na famianan di e fayecido, DIARIO ta extende su mas profundo palabra di condolencia.