ORANJESTAD (AAN): Awendia ta un dolor di cabez horta sea iPhone of headphone tipo Airpods. Pasobra via remote control e doño original por busca pa haya sa nan ubicacion.
Pesey mes riba Diahuebs merdia banda di 12:20 pm, un unidad di Polis di Noord a ser manda na un adres na Nuñe, relaciona cu un caso di hortamento di headphone tipo Apple AirPods, cu awor a track nan y cu lo ta na e adres ey. E doño original ta coriendo den un Mercedes-Benz y ta solicitando Polis.
Polis a topa cu e Mercedes-Benz aki banda di Kapel di Tanki Leendert. E dama di inicial D. a bisa cu el a yama Polis como cu Diaranson anochi hende desconoci a drenta su auto, y a bay cu un suma di placa, y su Apple AirPods.
Usando e app di Apple, esta ‘Find My iPhone”, el a logra track e AirPods aki bek na altura di un cas na Nuñe. E ora e agentenan hunto cu e dama a bay rumbo Nuñe.
Yegando aya, e dama a mustra agentenan e app di ‘Find My iPhone’ cu ta indicando e ubicacion di e AirPods. E momento ey e GPS ta indica cu e precision ta djis algun meter di diferencia.
Riba e mapa, e ubicacion ta mustra cu nan ta den un pida mondi banda di caminda. Hunto cu e dama D., Polisnan a baha y busca banda di caminda, y enberdad a bin topa cu nan tambe!
Como cu e dama D. no kier a haci mas denuncia, y cu pe e caso aki a finaliza, nan a entreg’e e Apple AirPods, y e caso a finaliza. Na final a pone Central di Polis na altura.
Probablemente e ladron a ripara cu e Apple AirPods a cuminza wordo tracked, y el a djis dicidi pa zwaai nan benta afo. Y aki ta unda e doño a bin haya nan bek den pida mondi banda di camina di Nuñe.
