E tabatin marihuana cune y kier pidi asilo aki
- Polisnan a detene patras di ex-Nanki Beach
- El a admiti di a cruza e distancia di 30 km
ORANJESTAD (AAN): Tabata Diamars merdia banda di 1:05 pm, yamada a drenta na Polis cu hendenan cu ta na Baby Beach na San Nicolas, a mira con un Kitesurfer a aparece ta yegando di zuid, cada rato yega mas cerca, y tabata mustra claramente cu e persona aki ta drentando procedente di Venezuela.
Den pasado a yega di socede cu un Windsurfer di Venezuela a cruza e distancia di como 30 km pa asina baha te na Boca Grandi na San Nicolas, pa laga algun bulto yena cu droga atras. Pa asina e subi lama bek y mobiliza rumbo pa Venezuela.
E biaha aki, ta diferente unidad di Polis a ser manda mesora den area di Colony pa check kico ta pasando. Unavez cu unidadnan a yega den e area, nan a check banda di Baby Beach, y tambe na Rodgers Beach. A check tambe mas pariba, pero no a topa cu nada particular.
Despues di algun minuut, informacion a drenta extra informacion di e Kitesurfer aki, y e informacion aki a inclui descripcion di e homber cu a yega tera usando e tactica aki. Algun rato despues, a haya informacion cu e Kitesurfer e momento ey lo ta patras di e edificio di Rum Reef.
Polisnan a core bay den direccion di ex-edificio di Esso Club. Ora cu nan a yega den e area, nan a pasa parti pabao di e edificio, y parti patras di ex-Nanki Beach nan a topa cu un homber cu ta cuadra cu e descripcion duna.
Agentenan a acerca mesora e homber aki, y a bin nota cu e ta papa muha. Polis a cuminza sospecha cu e mes enberdad a caba di yega for di Venezuela.
Polis a puntra e homber pakico e ta muha, y el a declara na agentenan cu el a caba di yega di Venezuela, y a agrega mesora den su storia, cu e kier pidi Asilo Politico na Aruba.
Un tiki asombroso pa mira con e homber aki lo a lucha cu e bientonan fuerte cu a keda registra Diamars den dia, tin biaha cu rafaganan cu a yega hasta 61 km/h. Lama tabata bruto tambe cu olanan cu tabata yega 7 pia halto.
Algun agente a cuminza controla rond, y uno di nan a bay check e edificio di ex Nanki. Aki nan a bin topa cu monton di paña muha den un tas preto cu berde. Tambe a bin haya 4 saco di plastico grandi conteniendo marihuana. Pues el a haci trabao di mula tambe di droga.
Esaki ta suficiente descubrimento pa nan detene e homber di inicial C., naci na Venezuela, como sospechoso di a viola Articulo 4 di Ley di Droga, y tambe Articulonan 19 inciso A y inciso B di Ley di LTU.
Polis no a menciona den nan relato oficial, si acaso nan a confisca e material di Kitesurfing tambe di e narcotraficante aki. E investigacion ta sigui.
