ORANJESTAD (AAN): Tabata Diaranzon anochi banda di 9:00 pm, cu un unidad di Polis di Santa Cruz a ser manda un tiki pazuid di Bushiribana, na altura di e asina yama ‘Ostrich Farm’, pa check caso cu a haya un hende morto eynan.
Ora cu Polis a yega na e area banda panort di Ostrich Farm, nan a papia cu e persona di inicial K., kende ta esun cu a yama Polis.
Segun e ciudadano K. a splica, cu e atardi ey pa 4:30 pm, e tata di su amiga a bay jog y cana den area di Bushiribana, esta e ciudadano di inicial B.
Despues cu solo a baha, e casa di B. a bin ripara cu e ciudadano no a regresa cas di e canamento. El a purba yame, pero e no ta contesta telefon. Pero bon mes cu e señora sa con pa usa e sistema di ‘Find my Phone’ pa asina track e smartphone di e ciudadano B. usando sistema di GPS.
Asina el a haya un mapa cu ta mustra cu e posicion unda e ciudadano B. ta den area di Ostrich Farm.
E señora a splica cu e sa cu pa algun tempo caba, e ciudadano B. no ta ‘move’ hopi. El a cuminza preocupa su mes, y nan mes e anochi ey a sali bay den area di Ostrich Farm enbusca di e ciudadano B.
Y nan a bin logra localiza e ciudadano B. abao na suela pabao di Ostrich Farm. E no tabatin ningun señal vital.
Polis a pidi Central di Polis pa manda autoridadnan concerni pa check e asunto. Tambe a manda busca un Docter pa bay eynan.
Pa 9:55 pm, Dr. Texeir a yega y a constata morto di e ciudadano, y a indica cu el a fayece di morto natural.
Na famia di e fayecido, DIARIO y Cuerpo Policial ta manda su palabranan di condolencia.
