Homber di 44 aña herida cu bala a yega Hospital

Caso di tiramento di Meiveld

ORANJESTAD (AAN): Diahuebs atardi dilanti un supermercado na Meiveld a sosode un bringamento entre algun homber. Mester bisa cu e bringamento segun informacion no oficial tabata trata di dos a tres homber contra uno.

   Eynan varios tiro lo a cay y e autonan a sali un tras di otro cu velocidad halto.

   Algun minuut despues di incidente aki, personal di Servicio di Emergencia (SEH) na Hospital a nota yegada di un Kia Cerrato color bruin, e lo tabata envolvi den e problema na Meiveld.

  E chauffeur lo a baha core bay paden y tabata herida. A bin compronde cu e homber aki a ricibi impacto di bala y tabata mester a worde opera cu urgencia.

   Polisnan cu a yega mesora Hospitaal despues di a worde avisa a controla e auto, y ta bin haya un arma di candela y den auto tabata tin basta sanger.

   Mesora a sigura e auto pa asina e team forensico di BFTO yega y su parti di investigacion.  Mientras cu despues mester bay tuma muestra di e victima, o sea di polvo ariba su curpa.

  Investigacion lo tin di saca afo si tabata tin intercambio di bala durante e tiramento. Y aki ta unda cu e chauffeur di e Kia Cerrato mirando cu el a haya impacto di bala a tuma direccion Hospitaal mesora mirando cu e tabata perdiendo sanger di e herida di bala.

   Un hipotesis ta cu durante e pelea y momento cu el a bay pasa man pa e arma esaki lo a tira y herida su mes.