Caso serio Diahuebs atardi
ORANJESTAD (AAN): Diahuebs atardi alrededor di 4:00 pm, un monton di yamada a drenta na Central di Polis, pa raporta cu tin un situacion serio andando, cu tiramento ta skeiro den Meiveld. Inmediatamente Central di Polis a cuminda manda patruyanan di Santa Cruz, Oranjestad, y tambe di Recherche pa e lugar.
Tur esaki a socede rond di 4'or polisnan a bay cu urgencia e supermarket unda antes tabata Kong Fui. Eynan lo a tuma luga yn caso di tiramento y lo tin hende herida.
Informacionnan na prome instante tabata bastante confuso di loke a socede den dia cla y dilanti hopi hende. Hecho si ta cu varios testigo a scucha e tironan.
Papiando cu un testigo cu net tabata pasando eybanda a conta cu el a tende un tiro y despues a mira e autonan, un Kia Cerrato color bruin y un Honda Fit color scur.
Loke a ser ripara, ta cu e ocupantenan di e auto compacto Honda Fit pa un of otro motibo a baha y bringa cu chauffeur di e Kia Cerrato, esaki nan su turno lo a logra aleha, pero bay den su auto y saca e arma y a tira.
E otro probabilidad ta cu e chauffeur di e Kia Cerrato lo por tabata tin e arma riba dje.
Momento cu e tironan a cay, esnan den e Honda Fit lo a core y probablemente te hasta laga un par di slof atras. Un ocupante di e Honda Fit tabata otro banda di caminda y a cora drenta e Honda pa huy.
Aki e Kia Cerrato a sali bay nan tras, ambos cu velocidad halto y e prome caya na man drecha ambos a lora pa bay sali na Morgenster.
Mientrastanto autoridad a cuminsa busca area Morgenster y Rooi Afo pa mira si ta topa cu e vehiculonan pero nada.
Despues lo mester a cuminsa un investigacion ariba e area unda a tira, pa mira si tin huls of otro cos.
Un rato despues un homber herida cu bala a yega Hospital. Esey por lesa di dje na Pagina 15.
