Doño di cas ta hasta bay sconde pa Polis
ORANJESTAD (AAN): Tabata den oranan di mainta pa 11:45 am, cu un unidad di Polis di Santa Cruz a wordo manda na un area di Sabanilla Abao pa check molester inmenso cu huma ta produciendo, y alavez sostene unidadnan di Bombero cu tambe a bay eynan.
Ora cu Polis a yega eynan, e agentenan a bin nota cu huma ta sali di un tereno di cas na Sabanilla Abao. Nan a nota cu ta parce cu e candela ta expande mas. Agentenan a papia cu Bomberonan, y nan a splica cu nan no por drenta debi cu e porta electrico grandi na entrada ta cera, y esaki ta wordo habri y cera cu motor. Polis a mira cu tin cura full rond di e cas aki, cu muraya di transhi, y un porta grandi. Polis a mira cu mas na halto riba e transhi tin prikkeldraad y tambe wayanan electrico poni. Polis ta pensa cu lo tin coriente na e wayanan aki.
Polis y Bomberonan a purba nan suerte na e porta, y nan a logra di habri esaki. Di e forma ey porfin Bomberonan por a drenta y paga e candela, y evita cu esaki ta plama y expande.
Tanto Polis y tambe Bombero a tuma nota cu ora cu nan a yega na e cas na Sabanilla Abao, nan a mira con e persona den e cas a core bay sconde.
Poco rato despues un homber a yega eynan den auto. El a declara cu e ta amigo di e famia, y cu tin biaha e ta bin yuda e famia. El a bisa cu e compania ta doño di un negoshi, y cu nan ta kima palo pa haya sas y shinishi, cu ta wordo usa pa traha compost pa plantamento di mata.
Autoridad a papia cu bisiñanan tambe, kendenan a declara cu nan ta sufri inmensamente di e huma cu ta sali di e adres ey. Ta parce comosifuera den e area ey di Sabanilla Abao, a bira “costumber” di pega candela sin worry cu demas hende den area. Polis a haya confirmacion di casi tur bisiña, cu desde hopi tempo caba nan ta sufriendo di huma aki.
Polis a tuma tur e kehonan aki, y a traha un rapport oficial riba e asunto. A pone Central di Polis na altura, y a informa Comandante di Bombero tambe riba e reclamo di e bisiñanan.
