Dama a lesiona enkel seriamente subiendo trapi

ORANJESTAD (AAN): Dialuna den ora di atardi laat, Central di Polis a dirigi unidad di Polis di Noord rumbo pa e edificio comercial cu tin net pabao di gasoline station di Citgo Palm Beach,

como cu hendenan ta tende gritamento di un dama, cu ta bin di e parti ariba di e compleho.

   E unidad di Polis a yega, na e trapi cu tin banda pabao di e edificio, a topa cu un dama cu tabata sclama di bastante dolor. A resulta cu durante cu e dama tabata subiendo e trapi, y algo a bay robes, pues lo a haci un ‘misstep’.

   Den e movimento inespera aki, el a troce su pia y muy probablemente a kibra su enkel, y esaki tabata hopi dolor.

   Ambulance a worde pidi, y na yegada Paramediconan no a haya e situacion uno facil, debi cu mester a trata cu cautela pa stabilisa e lesion. A dura basta rato, pa por a bah'e y pone den ambulance. 

   Pues un descuido a causa cu e dama a pasa den minuutnan largo di dolor. Bureau Slachtofferhulp tambe a worde poni na altura.