Diestres turista herida ora vehiculo 4x4 di Safari Tour a cay di sero

Accident na Parke Arikok

ORANJESTAD (AAN): Tabata Diahuebs mainta pa 10:30 am cu un unidad di Polis di Santa Cruz a wordo manda cu urgencia na San Fuego, net na entrada di Parke Arikok como cu un vehiculo 4x4 di Safari Tour a baha for di sero cu como 14 pasahero abordo.

   Polisnan a mobiliza cu urgencia y net na e entrada di e Parke, e unidad a wordo dirigi door di Park Rangernan na e banda robez di caminda, pa asina nan yega na e subida unda e accident a socede.

   Polis a mobiliza y drenta den e pida mondi, unda nan a bin topa cu e vehiculo 4x4 color geel pega bao di par di cadushi.  Esaki ta e tipo di vehiculonan di marca Agrale Marruá, modelo AM300, cu ta fabrica na Brasil y wordo usa door di De Palm Tours.  E ta manera un pickup cu espacio dilanti pa 2 hende sinta, y den e baki tin 4 rij di stoel pa pasaheronan sinta aden.  E stulnan aki tin seatbelt tambe.

   Aki ta unda cu Polisnan a bin ripara cu tin un grupo di turista canando den mondi rumbo pa e Information Center di Parke Arikok.  Polis a bay check nan, y a ripara cu mayoria di nan ta levemente herida.  Tambe a nota cu 2 di e personanan aki ta mas gravemente herida, y nan curpa ta tur na sanger.

   E vehiculo AM300 a keda pega na un cadushi.  E hood di e vehiculo ta habri, y e area di motor tambe a yena cu cadushi, y el a finaliza completamente bao di taki y tambe yerba seco.

   Polis a dicidi na yuda e Park Rangernan tambe guia e victimanan pa nan yega na e Information Center.  Tambe a pidi pa manda un Ambulans pa eynan.

   Na e Information Center, Polis a nota cu tabatin 13 turista riba e vehiculo AM300 4x4 aki, y tambe 1 chauffeur di De Palm Tours.  Diesdos di e 14 personanan tabata levemente herida, excepto 2 cu ta mas grave.  Cu Ambulans nan a wordo atendi.

   Como cu e vehiculo a keda na un pida basta leu for di caminda, a haci uso di e Takelwagen heavy duty di VGT Aruba Towing cu a yega eynan cu 2 unidad pa trek y saca e vehiculo di Safari Tour aki di e situacion ey.