Debi cu Wardacosta a detene nan den awanan Venezolano
ORANJESTAD (AAN): A dura te Diamars pa Ministerio Publico duna un declaracion oficial riba e caso di droga cu a worde intercepta den e anochi di Diasabra pa Diadomingo pazuid di Aruba.
Manera DIARIO a trece caba den extenso, oficialnan atento den Sala di Radar a detecta un boto ta yegando Aruba. Mesora a pone Polis como tambe Centro MOC di Wardacosta na altura.
Autoridadnan a subi lama y cuminza bay den direccion di e boto. A bin nota cu ta trata aki di un Speedboat cu diripiente a dal un buelta di 180 grado, y a cuminza bay back direccion zuid rumbo Venezuela.
Awor Ministerio Publico ta confirma, cu Wardacosta di Caribe Hulandes a gara y detene e tres persona abordo, siendo cu ya caba nan tabata den awanan teritorial di Venezuela.
Boletin di Ministerio Publico: E boletin di Ministerio Publico a confirma cu Wardacosta a intercepta un boto sospechoso cu tres persona y droga abordo den anochi di 12 pa 13 di augustus ultimo, despues di un persecucion riba lama grandi.
Aunke e persecucion di e Speedboat tipo Go-Fast a cuminza den awanan teritorial di Aruba, e interceptacion a tuma lugar den awanan teritorial di Venezuela.
Wardacosta no ta autoriza pa detene sospechosonan cu no ta riba teritorio di Aruba.
Esey nifica cu Ministerio Publico a pone e tres personanan den libertad y entrega na Guarda Nos Costa (GNC) pa worde saca di Aruba.
Pero e droga a worde destrui conforme procedimiento di trabao.
Te ainda, ni Polis y tampoco Wardacosta, y ni Ministerio Publico no a duna un informe exacto ta cuanto kilo di droga ta papiando aki di dje.
