E prome celebracion Dia di polis

Cuerpo Policial celebrando 35 aniversario

Dia 16 di Augustus 1988 tabata tin e prome celebracion di Dia di Polis. Y e fecha aki a bira oficial te cu e dia di awe.

Despues cu a canta Himno Nacional “Aruba dushi tera” a cuminsa cu un desfile dilanti di warda di Polis Oranjestad direcion pa Misa Catolico di Oranjestad, acompaña pa miembronan di Aruba y islanan ruman Corsow, Boneiro y Hulanda completamente uniforma, cu bandera y brasband. A sigui cu un Santo sacrificio di misa, y weganan deportivo amistoso.  

Pa un siman largo tabata tin diferente actividad deportivo y social pa e coleganan polis, entre otro karaoke, softbal, coremento, domino, roncamento di cabuya, billiard, tennis etc.  y asina e coleganan tabata pasa momentonan inolvidable cu otro.

Pa e prome celebracion tambe tabata tin un actividad na Bushiri Beach Hotel caminda tabata presente e.o e prome Comisario di pais Aruba, Sr. Peterson, Minister di Husticia Sr. Watty Vos (q.e.p.d.). y Minister President Sr. Henny Eman y coleganan polis di Corsow, Boneiro y Hulanda.

Den otro edicion lo bin mas historia di 35 aña di Cuerpo Policial Aruba.