Cuerpo Policial Aruba ta celebra 35 aniversario

ORANJESTAD (AAN):  Dialuna 16 augustus 2021 Cuerpo Policial Aruba ta celebra su 35 aniversario.

Desde cu Aruba a haya su Status Aparte, Cuerpo Policial Aruba a wordo funda. E tempo ey a cuminsa cu menos di 200 polis. Mayoria polis tabata di nos ruman antiyas. Den feliz memoria ex-Alto Comisario di Polis Sr. Ronald. W. Peterson tabata tin e tarea pa forma polis, forma un cuerpo den un etapa nobo como pais autonomo den Reino Hulandes.

For di e tempo ey Aruba a conoce su prome agentenan femenino cu tabata señora Marlen de Cuba-Giel y señora Gerda Williams. Alavez a conoce e prome wardanan di polis cu ta di Oranjestad cu a wordo traha na unda ta awe Renaissance Hotel y warda di Polis San Nicolas. Ambos tabata e wardanan oficial despues di 1986. For di e tempo ey Cuerpo Policial Aruba a mehora, a expande, a conoce cambio y e organisacion a bira mas grandi. Cu trabou duro nos por mira for di unda KPA a cuminsa, con el a gatia y unda nos ta mira nos mes pa futuro.

Awendia KPA por conta cu mas o menos 600 polis y personal administrativo trahando incansabelmente pa brinda seguridad na nos pueblo. Ta trata aki di hende homber y muhernan balente trahando den 4 distrito, cu ta warda di Polis situa na Oranjestad, Noord, San Nicolas y Santa Cruz. Pa prome biaha den historia di Aruba ta conta cu prome Alto Comisario femenino cu ta señora Vanessa Tjon-Kock.

Durante aña KPA por conta cu diferente unidadnan special cu ta forma parti di nan organisacion manera: Unidad motorisa, Unidad Canino, Team di aresto, Mobiele Eenheid, Duik Team, Kust surveillance, Helicopter unit, Surveillance y sin lubida e departamentonan conoci di Recherche cu ta bon entrena y capacita pa investiga y soluciona  casonan mas complica.

Cuerpo Policial Aruba su nomber ta wordo reconoci cu hopi respet internacionalmente entre otro manera Interpol, DEA, FBI, RCMP, Force Protection Agency, ACCP y IACP. Tambe trahando den cooperacion estrecho cu Cuerpo di Polis di Reino Hulandes manera, Korps Politie Rotterdam, Rijmond, KLPD, RST, Korps Poltie Curacao, Korps Politie Carabische Nederland y mucho mas.

E vision di Alto Comisario señora Vanessa Tjon-Kock ta pa prepara y inverti den e Cuerpo pa e retonan cu ta bay tin nan dilanti. Usando e strategia pa inverti den calidad di e servicio y experticio di e trabao di polis y reforza e cooperacion cu partners den e cadena hudicial.”

Awendia comunidad por ta orguyoso di su Cuerpo Policial Aruba. Ta 35aña di crecemento y lo sigui crece cu bista riba futuro. Pabien na cada polis y personal administrativo cu ta haci nan trabou cu dedicacion, tempo y pasion pa brinda lo mihor pa pais Aruba. Miembronan di Cuerpo Policial tambe ta gradici na cada famia pa nan aprecio, comprension y sosten na cada polis cu ta sirbi nan pais.