Unit Narcotica activo den George Madurostraat
ORANJESTAD (AAN): Tur cos ta mustra cu e losmento di tiro cu a socede Diaranson den dia den area di Beaujonstraat y George Madurostraat, a cuminsa haya momentum den investigacion. DIARIO a publica den edicion di Diahuebs, cu testigonan a mira 3 persona ta discuti den e caya ey, y na final dos di nan a drenta un Toyota Vitz, y diripiente nan a cuminsa los tiro.
A base di descripcion duna, ya caba Diaranson a detene un persona cu a wordo haya ta cana banda di YMCA Dakota, y despues mesora poco despues a sigui cu un Razzia na un cas den Caya Huan Pablo II na Dakota.
Dia nobo a yega, y e investigacion a sigui rapido, y den consulta cu Ministerio Publico, a haya Fiscal duna OK pa asina Diahuebs den oranan trempan di mainta, e asina yama ‘Unit Narcotica’ hunto cu diferente departamento di Cuerpo Policial, a tene un razzia di sorpresa na un cas na George Madurostraat.
Vocero di Polis, Liliana Rasmijn, a confirma cu durante e entrada hudicial a detene dos persona. Ta trata di e homber C.C.R.R. di 31 aña naci na Aruba, y e homber J.G.K. di 42 aña naci na Aruba.
Polis a confirma, cu durante e razzia aki, ademas di detene e duo, nan a rista y bin topa pa asina confisca droga y un arma di candela.
Na e entrada hudicial diferente departamento di KPA ofrece sosten y yudansa. Vocero a indica cu no ta descarta cu lo por tin mas detencion.
Unit Narcotica (antes conoci como ‘Drugspanden’) ta un team cu a wordo lanta desde 1 Augustus 2023 pa entre otro pa investiga bendemento di droga for di un cas y riba caya etc.
Pa Cuerpo Policial por resolve mas caso cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama e Tipline di Polis cu ta 111-41. Nan ta garantisa cu bo ta keda anonimo.
